Kum 2025 chhungin mi 6,915-in Mizo Hlakungpui Mual an tlawh

Mizo zinga thu leh hlaa mi chungchuangte hriatrengna atana hmun siam Mizo Hlakungpui Mual, Khawbung chu kum 2025 chhung khan mi 6,915-in an tlawh. Hlakungpui Mualah hian April 2026 hian thu ziakmi pali leh hla phuah thiam pahnihte dah luh belh a ni dawn.

Mizo Hlakungpui Mual hi kum 1986 khan Mizo hla phuah thiam Patea leh Damhauva te hriatrengna lungphuna bul ṭan a ni a, kum 10 dan zelah Mizo zinga thu leh hla lama thawh hlawk, an thih aṭanga kum 5 tling chinte dah luh ṭhin a ni. Hlakungpui Mualah hian thu ziakmi 15 leh hla phuah thiam mi 21 hriatrengna lung phun a ni tawh.

Mizo Hlakungpui Mualah hian April 8-9, 2026 khian Mizo zinga ziakmi pali - Capt. LZ Sailo, Rev. Zairema, Khawlkungi leh Lalhmingliana Saiawi te, hla phuah thiam pahnih - Hrawva leh Lalmama te dah luh belh a ni dawn. Mi paruk seng luh an nih chuan Hlakungpui Mualah hian ziakmi 19 leh hla phuah thiam 23 an awm tawh ang.

Kum 2025 chhung khan Mizo Hlakungpui Mual hi mi 6,915-in an tlawh a, chu'ng zinga mi 11 chu ram dang mi (foreigner) an ni a, India ram state dang mi 16 an awm bawk.