Ruihhlo bâwih aṭanga tal chhuak turin tum tlatna neih a ngai - Home Minister

Home minister K Sap-danga chuan January 10, Inrinni khan OKM Home, Phunchawng a tlawh a, ruihhlo bâwih aṭanga tal chhuak tur chuan tum tlatna neih a ngaih thu a sawi.

K Sapdanga chuan, duh rêng vang ni lo, eng emaw avangin sualah tluk luh a ni fo tih sawiin, "Ruihhlo bâwiha kan táng hi chhuak tur chuan tum tlatna a awm a ngai. Ngei theih loh, sim theih loh thil hi a lo awm tak tak lo a, mi'n a tum tak tak chuan a sim thei ngei a ni," a ti a; ruihhlo bâwiha tâng mekte chu an harsatna tawhte chhelna atana hman tum turin a chah.

Home Minister chuan, sorkarin a tum lian ber chu nun kawng dik an zawh theihna tura dan kenkawh te, hrem ngai hrem te, siamṭhat ngai siam ṭhatte a nih thu sawiin, "Chu tho chu Excise department lam pawhin an tum a ni. Vawiinah he laia awmte ka fak em em che u, in nihna in pawm a, damna duhin he lai hmun in pan hi a ni. Sorkar ang pawhin he hmunah hian kan theih ang ang ti turin kan inhawng a ni," a ti.

Home department chang tura ruat a nih thu leh a thawhpui turin Excise minister atan Lalnghinglova Hmar ruat a nih thu sawiin Minister chuan, "He mawhphurhna kan lak ve phat aṭangin Pu Tetea nen ruihhlo rawn luh tamna Champhai lam kan tlawh," a ti a, Mizo ṭhalaite rûntu ruihhlo nasa zawka do dan tur an ngaihtuah thu a sawi.

K Sapdanga chuan, OKM chu Pathian ngaihin ropui tak nia a hriat thu sawiin, "Damna zawnga punkhawmna hmun a nih avangin thlarau thianghlim pawhin hna a thawk zel ang tih ka ring. Bible-ah hian hmangaihna hi a bul a ni. Harsatna kan tawhna hmunah leh natna hrang hrang kan tawhna hmunah pawh Pathian hmangaihna hian min thlahthlam hauh lo tih hi a lang chiang hle," a ti.

Sum leh paite, hriselnate pawh hi hlimna a lo ni chiah lo tih sawiin Sapdanga chuan, "Hlimna chu Pathiana mi a innghah tlatna hmunah a awm ṭhin. Engkim tuar chhuak turin inbuatsaih ila, taksa, rilru leh thlarau damna chang ngei turin duhsakna ka hlan che u," a ti a; OKM Home-a awmte chu damna famkim changa chhuah tum ṭheuh turin a fuih a ni.

Home Minister hian OKM Home Sports khârna inkhawm a hmanpui nghal a, lawmmante a sem. OKM Home-ah hian thawktu mi 40 velin mi 400 vel an enkawl mek a ni.