KHAWTHLIR

KṬP-in thisen pe

KṬP, Ramthar Veng Bial chuan January 10, Inrinni khan Ramthar Tlangveng Kohhran Hall-ah thisen pek runpui an huaihawt a; Synod Hospital tan thisen unit 51 an pe a, petute mipa 49 leh hmeichhia pahnih an ni.

Chetsualnaah thi

January 9, Zirtawpni zan khan Lalremruata (44) s/o Darthangvunga (L), Mission Vengthlang chu lirtheia chetsualnaah a thi. Thu dawn danin, Lalremruata hi a ṭhianpa nen Tlawng lui bula mi lirthei chhia buaipui turin pick-up lirtheiin an chhuak a, Nursery Veng huam chhungah chesualin, kawng thlangah an tlan liam a ni. Lalremruata hi chetsualna hmunah a thi a, a ṭhianpa erawh a hliam na lo. Lalremruata ruang hi Central YMA hnuaia Disaster Response Team-te'n zan dar 8:30 velah an la chhuak a ni.

Ramri khàr titawp

Lawngtlai district magistrate Donny Lalruatsanga chuan, Lawngtlai district-a tuihri (cholera) lêng vanga Mizoram (India) leh Myanmar ramri khar leh ramri kaltlanga sumdawn khapna thupek tihchhuah tawh chu January 9, 2026 khan a sût. Lawngtlai district-a tuihri lêng chu a ziaawm chho zel tih Bawrhsap chuan a tarlang.

La hmu kim lo

January 9, 2026 (Zirtawpni) tlaia Sihphir Neihbawiha quarry chimin a delh mi pahnihte chu nimin tlai thleng khan hmuh an la ni lo a, zawn chhunzawm zel an ni. Tarlan tawh angin, quarry chim hian mi pali a delh a, pahnih lak chhuah tawh niin, pakhat a thi a, pakhat chu damdawi-inah enkawl mek a ni.

Heroin man

Champhai police-te chuan January 10, Inrinni zan dar 10 vel khan Zokhawthar aṭanga Aizawl pan tur maxicab-a chuang Bawih Uk Mang (32), Tahan, Myanmar nia inchhal hnen aṭangin heroin gram 112 an man. Bawih Uk Mang hian Chhinga Veng, Aizawlah a cheng mek niin a insawi a; thubuai siamsak a ni.