Chorei hnamte'n Khambar Kut an hmang

Young Chorei Asso-ciation (YCA) chuan January 10, Inrinni khan Phaikhou, Damcherra, Tripura-ah Khambar Kut an hmang a, Central YMA aṭangin general secre-tary Prof. Malsawmliana leh hruaitu dangte'n an hmanpui.

Khambar Kût hi kum tin January 9-11, 2026 chhungin an hmang ṭhin a; kumina an hmannaah pawh mipui ṭhahnem tak telin, hnam làm leh zai chi hrang hrang entir a ni.

Prof. Malsawmliana chuan, Mizote'n kût chi hrang hrang an neih zingah chuan pawimawh bik leh pawimawh lo bik a awm loh thu sawiin, "Mipuiin kan hlut bik leh mipui nâwlpui huap lo kûtte erawh a awm. Kûtte hi hnam inpumkhatna atan te, nunphung leh tih dan hlui chhawm nun zelna atan te, nihna humhalh nante an ṭangkai a, i hmang uar zel ang u," a ti.

CYMA General Secretary chuan, Chorei mipuite'n harsatna an tawh leh thil danga puih an ngaihna a awm chuan CYMA a inhawn reng thu a sawi a; Chorei ṭawng leh nunphungte a dal zel loh nan theihtawp chhuah zel tur leh, hnam dangte'n an chîm ral theihna laka inveng zel turin a chah.

Khambar Kût hmannaah hian CYMA aṭangin General Secretary bakah committee member pasarih an tel a, Taitesena Group YMA hruaitu ṭhenkhat an tel bawk.