Minister hoin ṬBCC-ah hun hmang

Music Domain Mizoram (MDM), Mizoram State Legal Services Authority (MSLSA) leh National Health Mission te chuan January 9, 2026 khan Ṭawngṭai Bethel Camping Centre (ṬBCC)-ah MDM charity sum hlanna leh rilru hriselna chungchang inzirtirna an buatsaih a; Excise & Narcotics minister Lalnghinglova Hmar-in a hmanpui.

Lalnghinglova Hmar chuan, ṬBCC-a awm mekte chu beidawng lo tur leh dam chhan an nei tih hre reng turin a fuih a, "Sorkar chuan ruihhlo ngaite che vel a thlir reng a, an ṭhat chhuahna tur a ngaihven reng. Mi tam takin ruihhlo ngaihna aṭangin nun pangngaia kîr leh thei khawpin an sual chhuak tawh," tiin, beiseina nena hma lam thlir a, dinhmun ṭha zawk nen ṬBCC chhuahsan tum turin a chah.

Excise Minister hian ṬBCC hotu TT Zohmingthanga nupui Lalhmangaihi hnenah MDM Winter Blast 2025 aṭanga hmuh ṭanpuina sum leh Excise & Narcotics department aṭanga ṭanpuina Rs 20,000 a hlan a ni.

Inkhawmah hian MSLSA member secretary Vincent Lalrokima'n MSLSA hmalaknate sawiin, MSLSA leh district tina district Legal Services Authority-te leh Legal Aid Clinic-te chu puih ngaite pui tura an inrin reng thu a sawi.

Tele MANAS, Mizoram Mental Health counsellor Vanlalruata'n ruihhlo leh ruihhlo ngaite chungchang a sawi a; ruihhlo ngai, rilru lama harsatna neite tan district hospital pariatah puitu tur an awm thu leh, engtik lai pawhin phone number 14416-ah mithiamte biakràwn theih reng an nih thu a sawi bawk.

ṬBCC-ah hian January 9, 2026 khan mi 391 enkawl mek niin, mipa 337 leh hmeichhia 54 an ni a, thawktu mi pathum an awm a ni.