Supply Minister leh Governor ten Oil depot din chungchang sawi dun

Food, Civil Supplies & Consumer Affairs (FCSCA) minister B Lalchhanzova chuan nimin khan Lengpui Airport lounge-ah Mizorama oil depot din chungchang Governor Gen. Dr Vijay Kumar Singh a sawipui.

B Lalchhanzova chuan, Mizoramin oil depot a mamawh avangin a neih ngei theih nan theihtawp chhuahpui turin Larsap a ngen a, "Oil depot hmun tur hi IOC chuan hmun hnihah an en tawh a, oil depot neih ngei kan mamawh vangin neih tumin sorkarin theihtawp a chhuah a ni," a ti a; oil depot nei tura hmalak tawh dante a hrilh.

Governor chuan, oil depot chungchang chu sorkar laipuia thuneitute hnenah a sawi tawh thu sawiin, "Oil depot dinna hmun tur Sairang Railways Station bulah in neih phawt a ngai. Oil depot dinna atan IOC chuan cheng vbc tam tak an seng dawn a, ram manah chuan sen an duh lo. Sorkar ram in ngaihven a ngai, chumi hmang chuan hmalak zel theih a ni ang," a ti.

FCSCA secretary Teresy Vanlalhruaii chuan, oil depot nei tura ministry bultuma IOC nen Decem-ber 2025-a Delhi-a an rorelte Governor a hrilh bawk.

Larsap leh FCSCA Minister hian remchang hmasaah oil depot chungchang Aizawlah sawi dun leh a, Mizoramin oil depot a neih ngei theih nan theihtawp chhuah zui zel an tum a ni.