Tourism Minister-in Kawtchhuah Ropuia PRASHAD hnuaia hna thawh mek a enfiah

Tourism minister Lalnghinglova Hmar chuan nimin khan Vangchhia khuaa Kawtchhuah Ropuia PRASHAD (Pilgrimage Rejuvenation & Spiritual Augmentation Drive) hnuaia Cultural & Heritage Centre project kal mek a tlawh.

Kawtchhuah Ropui hi Archaelogical Survey of India hnuaia protected monument a ni a, 'Menhirs and Caves at Vangchhia' tih a ni. Project kal mek hi 'Development of Basic Amenities under PRASHAD Scheme at Vangchhia' tih niin, cheng nuai 547.32 sênna tur a ni a; ruahtui dah khawlna zêm (rainwater harvesting tank) te, solar streetlight leh khualzin mamawh leh lawm tur thil eng emaw zat siam a ni dawn.

Vangchhia VC House tuala inkhawm buatsaihah minister Lalnghinglova Hmar chuan, tourism tihmasawn turin khawtlang leh mipui nen inkungkaihna ṭha a awm a ngaih thu a sawi a, "Project hi a bul ṭantu chu sorkar ni mah se, a thawk hah tur leh a hlâwkna têltu tur chu mipui an ni," a ti.

Tourism Minister chuan, Mizoram hmun tam takah khualzin hîp nan hmunhma leh punkhawmna (event) siam chawp a ngaih laiin, Vangchhiaah chuan khualzin hîptu ṭha tak a awm sa tih a sawi a; "Sorkar tum danah chuan, tourist lodge sak rup ai chuan homestay siam a tum zawk," a ti. PRASHAD hnuaia project kal mek chu ṭha taka lo enkawl tur leh, khualzin an neihte ṭha taka lo dawngsawng zel turin Vangchhia mipui a chah bawk.

Minister hi Tourism director R Lalrodingi leh Mizoram State Sports Council secretary Henry C Lalrawnkima ten an ṭawiawm a ni.