KHAWTHLIR

Feb. 17 aṭangin Budget session

Governor Gen. Vijay Kumar Singh chuan February 17, 2026-a ṭan turin Assembly budget session a ko. Mizoram State Legislative Assembly pakuana ṭhutkhawm vawi rukna neih tur hi ni tin chawhma dar 10:30-ah ṭan ṭhin tur a ni a; session-in a awh chin tur leh hun hman dan turte chu speaker Lalbiakzama kaihhruai Business Advisory Committee-in an la rel dawn a ni.

KṬP-in thisen pe

KṬP, Saikhamakawn Branch chuan an din champha lawm nan nimin khan thisen pek huaihawtin, Synod Hospital tan thisen unit 27 an pe a, petute mipa 22 leh hmeichhia panga an ni.

Kawng khâr rih

PWD chuan nimin aṭang khan Durtlang Leitan aṭanga Durtlang North inkarah kawng blacktop hna an thawk a; hei vang hian kawngpui khar a nih thu leh, hna thawh zawh a nih hma chu khar a nih dawn thu Aizawl Traffic SP chuan a tarlang.

YMA jubilee lawm

Bualpui Branch YMA chuan nimin khan an golden jubilee an lawm a, bialtu MLA K Laldawngliana'n hmanpuiin, jubilee lungphun a hawng. K Laldawngliana chuan, YMA chu politics rawngkai lo, tlawmngai pawl a nih thu sawiin, "Politics-ah YMA-te inrawlh lo turin ka ngen che u. Ram rawngbawl hnaa kan tel duh a, politics kan khêl duh a nih chuan YMA-a kan nihnate huaisen takin kan bànsan ngam tur a ni. Pawl thianghlim kan hnam ro hlu hi engmahin a tihchhiat leh a pawlh dal rem kan ti tur a ni lo," a ti.

Zu ûm 259 man

Excise and Narcotics department mite chuan January 9, 2026 zan khan Rangvamualah Lalrinchhani (40) d/o C Tawnluia (L), Rangvamual Mel-3 nia inchhál hnen aṭangin zu ûm 259 an man. Zu an mante chu sapzu ûm 137 leh rakzu ûm 122 a ni a, beer bûr 26 an man bawk