MJA-te'n infuihna hun an hmang

MJA General Headquarters chuan nimin khan Aizawl Press Club-ah kum thar 2026 pualin thingpui inhona leh infuih tharna hun an hmang a, member ṭhahnem tak an tel.

Fuihna thu sawitu MJA president C Lalrambuatsaiha chuan, Mizoram hmun hrang hranga MJA member-te kum thar chibai bukin, duhsakna a hlan a; MJA member zingah pawl thil tih leh hmalakna ngai pawimawh tâwk lo an awm ṭhin chu ṭha lo a tih thu sawiin, MJA hmalakna ngai pawimawh lehzual turin member-te a chah.

MJA President chuan, journalist-te chu hunbi nei mumal loa hna thawk ṭhin an nih avangin hriselna lam ngaih pawimawh lehzual a ṭul thu a sawi a; zu avangin mi ṭhenkhatin tak hriselna lamah harsatna an tâwk ṭhin tih sawiin, mahni inthunun tur leh chintâwk nei thiam turin member-te a fuih.

Inkhawm hi MJA vice president C Lalhmachhuana'n a kaihruai a, general secretary K Zothanpara'n kum 2025 chhunga MJA hmalakna leh chêt velna tlangpui a tarlang.

Report-a a lan danin, MJA-ah hian member 191 an awm mek a, chung zinga mi 89 chu General Headquarters, Aizawla mite an ni a, mi 102 chu district hrang hranga mite an ni.

MJA member 191 zinga 136 chu accredited journalist an ni a, accredited journalist mi 136 zinga 56 chu Aizawla mite niin, a bak mi 80 chu district hrang hranga mite an ni.