Forester training zote thlahna hun hmang

Environment Forest & Climate Change (EFCC) minister Lalthansanga chuan nimin khan Bethlehem Vengthlanga Forester Training School Conference Hall-ah '24th Batch Forester Training 2025-26 Convocation' a hmanpui a, trainee ti ṭha zualte hnenah lawmman a hlan.

Lalthansanga chuan, forester training zote chu an training chhunga an thil zirte hre reng a, an hnathawhnaah ṭangkai taka hmang zui tura chahin, "Mipui hmaah chuan field staff-te hi Forest department hmel siamtute in ni," a ti a, khawtlang leh pawl hrang hrangte ṭha taka thawhpui thiam a pawimawh thu a sawi.

EFCC Minister chuan, ram leh hnam tan an thâ leh zung piah lamah, an thiamna leh theihnate hmang zel tura chahin, "Forest department leh mipui inkarah thawhhona ṭha a awm theih nan kan ramngaw, thing leh mau, nungchate venhimna leh humhalh kawngah zau zawka mipuite thleng phak inzirtirna chi hrang hrang huaihawt a pawimawh," ti.

Inkhawmah hian principal chief conservator of forest Rajeev Kumar Tiwari pawhin thu a sawi a, Forester Training School principal Vanlalnunpuii Hmar-in an dinhmun tlangpui a sawi bawk.

Forest Training School hi November 1974-ah din a ni a, forester 336 leh forest guard 643-in training an zo tawh a ni.