Minister-te'n chhiatna thlenna an tlawh

January 9, 2026 tlai dar 3:30 vela Sihphir Neihbawiha quarry chimin a delh zinga mi pahnih zawn mek a ni a, nimin thleng khan hmuh an la ni lo. Chhiatna thlenna hmun hi nimin khan Disaster Management & Rehabilitation (DMR) minister Prof. Lalnilawma'n a tlawh a; minister pahnih K Sapdanga leh Lalthansanga te an lo tlawh tawh bawk.

DMR Minister chuan, chhiatna thleng chu pawi a tih thu sawiin, chhiat tâwkte chhungkua leh Sihphir khawtlang a tawrhpui thu a sawi a; lung chimin a chhilh mi pahnih la chhuak tura theitawp chhuahtu Sihphir khawtlang, Central YMA, sorkar department te, Quick Response Team leh Disaster Response Force te chungah a lawm thu a sawi. A ṭula hman atan Sihphir khawtlang hruaitute hnenah Rs 10,000 a pe a ni.

Quarry chim hian mi pali a del a, Manipur lam mi Muana chu thia lak chhuah tawh a ni a, hliam pakhat pawh lak chhuah tawh niin, damdawi-inah enkawl mek a ni. Mi pahnih erawh lak chhuah an la ni lo a, lak chhuah tuma bei zui zel a ni a; la zawnte hi Chakma leh Jharkhand state mi nia hriat an ni.