Hnahsin Kût buatsaih chungchangah CNC leh Tourism ten thawhho an duh

Tourism minister Lalnghinglova Hmar chuan nimin zing khan Champhai Nature Conservancy (CNC) hruaitute Champhai Circuit House-ah a kâwm a; Hnahsin Kût buatsaih chungchangah Tourism department leh CNC thawhho dan tur sawihoin, mumal zawka thawhho an rêl.

Lalnghinglova Hmar chuan, CNC leh an thawhpuite'n an huaihawt ṭhin Hnahsin Kût chu Mizorama kût lian ber pakhat a nih thu a sawi a, "Tun aia lian leh zau zawka kalpui theih niin a lang. Chumi tur chuan kohhran leh khawtlang hruaitute nen inlungrual taka kalho a ngai a, in mamawhnaah sorkar pawhin theihtawp kan chhuahpui zel ang," a ti.

Hnahsin Kût tihhmasawnna atana rawtna a neihte sawiin Tourism Minister chuan, Hnahsin Kût vanga Champhai tlawhtu khualzinte chu Champhai district chhunga Mizo hmun pawimawh leh mawi te kawhhmuh leh tlawhna hun siam ṭha a tih thu a sawi.

Champhai Nature Conservancy president Dr Sammy Laldinthara chuan, Hnahsin Kût buatsaihnaah sorkar, a bikin Tourism department-in an thlawp ṭhat avangin an lawm thu a sawi a, "Beisei phak baka a len chhoh avangin sum leh pai lamah harsatna a awm thei a, sorkar nen thawh dunna mumal zawk neih a ṭul. Hnahsin Kût hi event-based festival a ni lo a, Hnahsin leh Champhai district mawina behchhan zawk turin her rem theih a ni," a ti.

Sawihonaah hian CNC rawtna angin, Hnahsin Kût buatsaihnaah mumal zawka sorkar nen thawhho ni se, an ti a; kalphung awm sa tidanglam lutuk si loa thawhho dan tur chipchiar zawk chu Tourism department hotute leh CNC hruaitute’n February 2026 ral hmain sawiho leh ni se, an ti bawk.

Minister hi Tourism director R Lalrodingi leh official dangte'n an ṭawiawm a; Director hian sorkar nen thawhho dawna zawm ngai leh tih tur pawimawhte a sawifiah a ni.