KHAWTHLIR

Khuaiin zûk hlum

Rongenga (59) s/o Rosiama, Khawhai chu January 12, Thawhṭanni chawhnu lam khan huan an sâmnaah khawi-chhûnmú nia hriatin an zûk rawn a, Khawhai damdawi-in (PHC) panpui ni mah se, tlai dar 5 velah a thi. Rongenga hi a hrawk, a ngháwng leh a tukkhum velah khuaiin an zûk a ni.

END-in meth man

Excise & Narcotics department chuan January 12, Thawhṭanni zan dar 7:30 khan Aizawl Tennis Court bulah methamphetamine kg. 11.118 (mûm 1,20,000) an man. Meth neitua puh Yahya Hussain (23), Jagannathpur, Karimganj district, Assam leh Lalchhuanliana (45) s/o Thangluaia (L), Ruantlang, Champhai, tuna Durtlang Leitana khawsa mek nia inchhálte an man nghal a; meth phurhna Mahindra Thar Roxx MZ-01 AE-4632 leh mobile phone pahnih an hrènsak bawk.

Tuipuiral Annual Sports Meet hawng

Sports & Youth Services minister Lalnghinglova Hmar chuan January 12, Thawhṭanni zan khan Champhaia Lianpui Community Hall-ah Tuipuiral Games & Sports Association buatsaih Tuipuiral Annual Sports Meet vawi 53-na a hawng. Minister chuan, politics khelh nan infiamna hmang lo turin mipui a sáwm a; Tuipuiral GSA hnena ṭanpuina pek ṭhin chu Rs 50,000 aṭangin nakkumah Rs 1,00,000-ah tihpun a nih dawn thu a sawi.

Ruihhlo man zat

Central YMA hnuaia Kumpuan duty-te chuan December 11, 2025 aṭanga January 12, 2026 inkar khan heroin (no. 4) hawng 22 leh Tictac bûr 41 an man a; alprazolum mûm 280 leh ganja fûn khat an man bawk. Ruihhlo kaihhnawihah hian mi 192 an man a, chu'ng zinga 85 chu home-ah an dah a, Excise & Narcotics leh Police-ah mi pahnih ve ve an hlan a ni.

Training buatsaih

Economics & Statistics hmalaknain nimin khan Saitual Presbyterian Kohhran hall-ah piang leh thi chhinchhiahtu (birth & death registrar)-te tan annual training buatsaih a ni a; addl DC Lallawmawma'n hmanpuiin, death certificate leh birth certificate pek chhuah chungchangah fimkhur turin kal khawmte a chah.