Mizoram leh mipui tan hma kan la zel dawn - PWD Minister

PWD minister Vanlalhlana chuan, 'Kalphung thar hnuaiah chuan hna a ṭha tur a ni' an tih ṭhin chu a taka a lan chhuah mek thu leh, Mizoram leh mipui tan hma an lak zel dawn thu a sawi.

Vanlalhlana hian nimin khan Ngopa khelmual tihchangtlun hawnnaah thu a sawi a, "Thla 18 chhunga zawh tura ruahman thla 9 chhunga zawh a ni hi ka lawm. 'Kalphung thar hnuaiah chuan hna a ṭha tur a ni a, a hun taka zawh a ni tur a ni' tiin kan sawi ṭhin a, he laiah a taka hmuh tur a awm a, lawmawm ka ti em em a ni," a ti.

Hmasawnna hnate ṭha taka thawh a nih theih nan viltu tur Project Monitoring Committee din a nih thu sawiin Vanlalhlana chuan, "Hnathawh reng reng a ṭhat leh ṭhat loh an endik ṭhin a, an result pawh kum 2 chhung hian kan hmu. Kum rei lo te chhungin hmasawnna hmêl tam tak kan hmu mek zel a, sawiselna karah pawh Mizoram leh mipuite tan hma kan la zel dawn," a ti a; Mizoram chu a ṭha zawngin a kal zel nia a hriat thu a sawi.

PWD Minister chuan, ram tana ṭha lote tih loh chu kalphung tharin a ken tel a nih thu sawiin, "Kan fel famkim kan ti lo a, eiru lo turin kan intiam. Tunah hian Mizoram chu India rama eiruk tlemna state-ah pahnihna kan ni mek," a ti.

Bialtu MLA F Rodingliana, minister of state pawhin thu sawiin, khelmual tihchangtlunna chungchangah KṬP General Conference 2024 sawi lan a ṭul thu a sawi a, "Mi ṭhahnemgngai leh khawtlang hruaitute'n theihtawp an chhuahna zara hlawhtling thei a ni," a ti a; khelmual chu dîm leh duat taka enkawl turin khawtlang hruaitute leh mipui a chah.

Ngopa khelmual hi North Eastern Council aṭanga sum hmuh Rs 3,74,43,801 hmangin tihchangtlun a ni a, March 15, 2025-ah thawh ṭan a ni.