Champhaiah ruihhlo do chungchang sawiho

Excise & Narcotics minister Lalnghinglova Hmar chuan nimin khan Champhai DC conference hall-ah Champhaia sorkar hotute leh khawtlang hruaitute kâwmin, ruihhlo do chungchang a sawipui.

Inkawmhona hi Champhai bawrhsap Mohammad Aaquib-a'n a kaihruai a; SP Lokeshwaran R-a'n ruihhlo donaa Champhai police-te hmalakna a sawi a, Excise & Narcotics assistant commissioner C Thangchuanga'n an hmalak dan a tarlang. Assam Rifles, Social Welfare leh YMA aiawhte'n an hmalaknate an sawi bawk.

Lalnghinglova Hmar chuan, Champhaia ruihhlo donaa hmalaknate chu fakawm a tih thu sawiin, ;ha lehzuala chhunzawm zel turin a chah a, "Border district a nihna angin ruihhlo lut leh chhuak a tam bik a, Mizo mipuite ruihhloin a tihbuai loh nan Champhai district hian tih tur mawhphurhna lian tak a nei a ni," a ti.

Excise Minister chuan, naupang leh ṭhalai zingah kohhran, khawtlang leh sorkar ten ruihhlo ṭhat lohzia an zirtir nasat lehzual a ṭul thu sawiin, "Sikul tinah awareness campaign tun kum chhungin vawi khat tal buatsaih theih ni se," a ti a; sorkar leh khawtlang hruaitu an ṭanrual a ṭul thu leh, ruihhlo donaah Champhai district chu a ṭul ang zelin sorkarin a puih dawn thu a sawi bawk.

Champhai district-ah hian kum 2025 chhung khan police-te'n heroin kg 38.477, methamphetamine kg 622.4, crystal meth kg 5.169, caffeine kg 3,000, alprazolam kg 4.470 leh corex gram 1.6 an man a; ruihhlo kaihhnawihah mi 260 manin, NDPS Act hnuaiah thubuai 149 an ziak lut.

Ruihhlo do beihpui thlakna Operation Jericho hnuaiah police-te'n heroin kg 9.235, methamphetamine kg 74.852 leh BEDC (Myanmar zu) litre 565 an man a, mi 52 leh lirthei 17 an man bawk.

Excise & Narcotics-in heroin kg 14.577, methamphetamine kg 125.065 manin, NDPS Act hnuaiah mi 132 an man a; BEDC (Burma zu) litre 2,733.100 leh country liquor litre 884.800 manin, MLP Act hnuaiah mi 183 an man a ni.