LS MP-in MoRTH Secretary a kâwm; Hna 3 atan sanction order chhuah a ni

Mizoram Lok Sabha MP Richard Vanlalhmangaiha chuan January 12, Thawhṭanni tlai khan Ministry of Road Transport and Highways (MoRTH) secretary V Umashankar chu tlawhin, Mizoram thil pawimawhte a sawipui a; V Umashankar hian hna pathum atan sum sanction order a tichhuak nghal nia tarlan a ni.

Richard Vanlal­hmangaiha hian, Mizoram châk lakna kawng pui ber NH-06 Kawnpui leh Sairang inkar kawng thawm ṭhat mekah hna a muan thu thlenin, fûr hmaa hna zawh a nih theih nan hma la turin a ngen a; V Umashankar chuan, chak taka hma an lak tur thuin a chháng.

Lok Sabha MP hian Mizoram tana hmasawnna kal mek dangte pawh a sawipui bawk a; Mizorama hna thawhna tur ruahman hrang hrangah a hma thei ang bera sum pe chhuak turin a ngen a ni.

ZPM thuchhuah chuan, Lok Sabha MP ngenna avangin MoRTH chuan January 12, 2026 vêk khan Mizorama hna thawh tur pathumah sum sanction tihchhuah nghal a nih thu an tarlang.

MoRTH-in sanction order a tihchhuah tarlante chu - cheng vbc 38.22 senna tur Performance Base Maintenace Contract - Champhai to Zokhawthar te, cheng vbc 109.58 senna tur Lawngtlai - Zochachhuah kawng siamna te, cheng vbc 10.33 senna tur Champhai-Zokhawthar kawng siamna (one time improvement) te a ni.