Sawhthing leh hmunphiah lei turah Bawrhsapte'n hriattirna an tichhuak

Mizoram sorkar chuan February 2, 2026 aṭangin hmunphiah leh sawhthing a lei leh dawn. Sawhthing lei chungchangah nimin khan Kolasib disrtict bawrhsap Robert C Lalhmangaiha kaihhruaiin sorkar hotute'n inbuatsaih dan tur an sawiho a; Lawngtlai DC Donny Lalruatsanga'n hriattirna a tichhuak bawk.

Kolasib District Agriculture Marketing Committee (DAMC) chairman Robert C Lalhmangaiha, bawrhsap hoin nimina ṭhukhawm hian kumina kut hnathawktute thar chhuah hmunphiah leh sawhthing lei dan tur leh ruahmannate thlirho a ni.

Bawrhsap chuan, Kolasib chu agriculture potential area a nih avangin kut hnathawktute hmasawnna atan thâ thlah lo turin kal khawmte a sawm a, Kolasib district-ah loneih lam kaihhnawihah ṭan lak thar a pawimawh thu a sawi.

DAMC member secretary Joseph Lalnuntluanga tarlan danin, kum 2025 khan sorkarin kut hnathawktute buh thar quintal 1,472 a lei a, kuminah pawh quintal 350 lei leh tawh niin, tunkar chhung hian buhhum lei chhunzawm a ni dawn.

Kolasib district-ah sawhthing leh hmunphiah leina hmun turin khaw tinah primary collection centre ruahman a ni a, primary collection centre-te'n an dah khawmna tur leh hralhna tur secondary collection centre (SCC) hmun pathum - Thingdawl, Saipum leh Vairengteah siam a ni.

Sorkar ruahman angin February 2 aṭanga May 30, 2026 thleng sawhthing leh hmunphiah lei a ni dawn a; primary society member-te thar chauh lei tur a ni a, SCC-a an lak theih hun chhunga hralhte chauh sorkarin price support a pe dawn.

Hmunphiah ro chu grade thliar loin kg. khat Rs 80-in ZOHANDCO-in an lei leh dawn a, hmun danga hralh duh zawk an awm pawhin kut hnathawktute hian an duh duhna hmunah hralh theih a ni.