BDO-te VB-G-RAM-G chungchang zirtir

Rural Development & Administration (RDA) minister Prof. Lalnilawma chuan block development officer (BDO)-te tan nimin khan SIRDPR-ah MGNREGA thlaktu VB-G-RAM-G scheme leh Management Information System inzirtirna a hawng.

Prof. Lalnilawma chuan, BDO-te chu thingtlang khuate'n hmasawnna an hmuh zel theih nan theihtawp chhuah turin a chah a, "In block chhunga hna hrang hrang pawimawh tak taka mawhphurtu in ni a, mipui leh sorkar department hrang hrangte thawhpui thiam a pawimawh," a ti . Kalphung pangngai piah lamah tih dan ṭha zawk leh thil tharte ngaihtuah chhuak a, mipui tan eizawnna siamsak a, ram hmasawnna tura thawk zel turin a fuih a ni.

Refresher course hawnnaah hian SIRDPR director R Lalremsanga pawhin thu a sawi a; course director Dr Khuangthansanga Pakhuangte-in course chungchang a sawifiah. Inzirtirna hi January 15, 2026 thleng buatsaih a ni ang.