Vawiinah khawpui tinah Mock Exercise

Vawiin hian Mizorama district khawpui tinah lirnghing a thlen palha chêt lâk dan tur tihchhinna, Mock Exercise on Earthquake Disaster buatsaih a ni dawn. Disaster Management & Rehabilitation (DMR) department hotute chuan, chî-âi lo tur leh thu dik lo thehdarh lo turin Mizoram mipui an ngen.

Mock Exercise neih tur hi nimin khan DMR secretary Udit Prakash Rai pisaah DMR hotute'n thuthar thehdarhtute an hrilhfiah. Udit Prakash Rai chuan, mock exercise a nih angin a tak taka thil thleng thei entirna a ni a, chî-âina tur a awm loh thu a sawi a, "Mizoram hi lirnghing nasa tak thlen theihna Seismic Zone-5 aṭangin lirnghing rapthlak tak thlen theihna, fimkhur leh inpuahchah ngai Seismic Zone 6-ah dah thar a ni. Sorkar mai ni loin mimal, chhungkua leh khawtlang ten lirnghing na tak thleng palh thei lakah kan inpuahchah a ngai," a ti.

National Disaster Management Authority (NDMA) leh Mizorama State Disaster Management Authority (MSDMA) leh district tina District Disaster Management Authority (DDMA) ten district khawpui tina hmun thlan bikah Mock Exercise an buatsaih dawn. Chawhma dar 10-ah rálkhêl dár (siren) tihrîk a ni dawn a, chhun dar 12 velah zawh beisei a ni. Tlai dar 4-6 vel chhungin mock exercise neih leh tur a ni a, rálkhêl dár tihrîk leh a ni ang.

Mock exercise chu enchhinna a nih thu sawiin DMR hotute chuan, chî-âi lo tur leh thu dik lo thehdarh lo tura mipui an ngen a, "Kan tana ṭangkai leh ṭha tur a nih avangin mipui hriathiamna, ṭawiawmna leh thawhpuina kan ngeni," an ti. Department hrang hranga mite bakah, Mizorama sipai (paramilitary) awm ang angte an tel dawn a, Kolasib leh Mamit district-ah chuan Assam leh Tripura state disaster response force-te an tel dawn tih an sawi.

District headquarters tina mock exercise endika zir chiang turin national observer pali an rawn kal dawn a ni.