Ṭamdila kut hnathawktute ṭanpuina hlan

Enviroment, Forest & Climate Change minister Lalthansanga chuan nimin khan Interpretation Centre, Ṭamdilah National Plan for Conservation of Aquatic Eco-System (NPCA) hnuaia Ṭamdil Wetland-a kut hnathawktute hnenah ṭanpuina a hlan.

Forest Minister chuan, Ṭamdil chu Mizoram dil lian ber dawttu a nih thu sawiin, "Kum 1893 vel aṭanga insiam nia sawi a ni. Kum 1973 vel aṭangin sorkarin a ngaihsak chho a, kum 1986 khan Forest department-in a enkawl a, humhalh leh tihhmasawnna hna an kalpui ṭan," a ti a; awmze nei zawka Ṭamdil enkawl a nih hnuah a ṭangkai lehzual a, zirbingmite'n an ṭangkaipui hle tih a sawi.

Ṭamdil enkawl leh humhalh kawngah EFCC department hmalakna ringawt chu a tâwk lo hle tih sawiin Lalthansanga chuan, "Ṭamdil hi kan ngaih pawimawh a, dimdâwi taka enkawl hi kan tih tur a ni. A kum tèlin tlawhtu leh ngaihlutu kan pung a, a tlawhtute lo zirtir a, Ṭamdil pawimawhna leh kan ngaihhlut tur a nihzia lo hrilh ṭhinte pawh hi kan tih âwm rêng a ni," a ti.

EFCC Minister chuan, National Plan for Conservation of Aquatic Eco-System (NPCA) hnuaiah Ṭamdil chhunga tui lam chi ramsate humhalhna leh tihpunna lam hna thawh a nih thu a sawi a, "Hemi aṭang hian kum 2010 khan uṭawk chi (species) thar hmuh chhuah a ni a, Ṭamdil hming chawiin Leptolalax Ṭamdil tih vuah a ni," a ti a; Ṭamdil chu uluk taka enkawl zel turin mi tin a chah.

Sorkar thuchhuah tarlan danin, Ṭamdil Wetland Reserve hi sq.km. 13.7 vela zau a ni a, kum 5 danah a enkawlna tur rîruang Ṭamdil Wetland Conservation Plan siam a ni ṭhin a, plan zûlzuiin hna thawh ṭhin niin, hnathawhna tur chu NPCA aṭangin dawn ṭhin a ni.

Ṭamdil tihhmasawnna atan leh tuihna a chak lehzual theih nan a chhehvel khaw mipui tan hna thawhna tur pek a ni ṭhin a, nimin khan chhungkaw 574 hnenah pek chhuah a ni. Nimina sum pek nen kum 2022-2026 chhungin cheng nuai 287 sem a ni tawh.