Kut hnathawktute tan theihtawp chhuah turin Horti Minister-in officer-te a chah
Horticulture minister C Lalsawivunga chuan nimin khan Horticulture department-in kum 2026 puala inhlanna an buatsaih a hmanpui a; department mi leh sate chu kut hnathawktute tan theihtawp chhuah turin a chah.
C Lalsawivunga chuan, Horticulture department officer-te chu kut hnathawktute tana biak nuam leh koh eih theih ni turin a chah a, "Mizoram tana department pawimawh kan ni a, kut hnathawktute innghahna kan ni. Officer niha awm ringawt a tawk lo a, Pathianin mipui rawngbawl tura thiamna a pekte kan ni tih kan inhre reng tur a ni," a ti.
Mizoramin intodelhna a la nei lo tih thu sawiin Minister chuan, "UT kan nih aṭangin kum 54 a ni tawh a, kawng khat talin thil pakhat talah intodelhna sawi tur kan la nei ve lo hi a pawi tak zet a ni. Kan ram hian intodelhna a neih ve theih nan in thiamna leh finnate tât hriam u la, kut hnathawktute tan awlsamna thlentu nih tumin theihtawp chhuah rawh u," a ti a; department thuruk vawng him turin a chah bawk.
Horticulture Minister hian booklet pathum - 'Thlai venhimna damdawi him leh dik taka hman dan' tih te, 'Sapthei chin leh enkawl dan' tih leh, 'Viticulture Manual (Grape chin leh enkawl dan)' tihte tlangzarh a ni.
HORTICUTURE DEPARTMENT TARLAN
• Mizoramah hectare 1,004-a zauah sapthei chìn a ni a, ton 2,230 vel kum tin thar a ni.
• Horticulture department-a MIDH hnuaiah area expansion-ah hmalak a ni a, Aizawl, Champhai, Serchhip leh Khawzawl district-ah kalpui mek a ni.
• Kum 2025-26 hian sapthei atan hectare 550-a zauah hmalak a ni a; India ramah Mizoram hi sapthei chin tamna ber zinga mi a ni.
• Grape hi Mizoramah thlai pawimawh tak a ni chho mek a, Champhai district-ah chauh commercial cultivation kalpui ni mah se, a chin leh thar chhuahah hmasawnna a nasa.
• Champhai district-a khaw 10 velah Horticulture department-in grape ṭanpuina a pe a, mi 352 hnenah kum 2025-26 hian Rejuvenation of Grape kalpui a ni.
• Mizoramah Bangalore Blue grape chin a ni ber a, Champhai leh Hnahlan winery-a wine siamna atan kut hnathawktute'n an thar chhuahte an pe reng.