Sawhthing powder hralh ṭan mek

Rural Development & Administration (RDA) minister Prof. Lalnilawma hoin nimin khan a pisaah Ropuiliani Women Farmer Producer Company Limited hmalakna thlirho a ni. He company hian sawhthing phut (powder) an siam a, Mizoram pâwnah an hralh chhuak ṭan mek.

Ṭhutkhawma tarlan danin, Ropuiliani Women Farmer Producer Company hian Mizoram hmun hrang hranga company shareholder-te hnen aṭangin sawhthing leh Mizo hmarcha a lei khawm ṭhin a, man zawka hralh chhuah turin a sawngbawl ṭhin. Sawhthing an leite chu sliced dried leh powder form-in an siam a, Mizoram pawna sumdawngte nen an indawr mek a ni.

Sawhthing powder an siam chu Mizo Ginger Powder an vuah a, KissanSay kaltlanga hralh ṭan mek a ni. MIFCO Complex, Chhingchhipah October 2025 khan primary processing unit an din. Mizo hmarcha an lei khawmte pawh grade mumal taka thliarin hralh mek a ni bawk.