Thilsiamte Chhantu Chawimawina hlan

Lalthara-te Unau Foundation (LUF) chuan nimin khan Aijal Club-ah Thilsiamte Chhantu Chawimawina hun an buatsaih a, mimal, pawl leh khua pahnih ṭheuh hnenah chawimawina an hlan.

Chawimawina an hlante chu - mimalah Vanlalhrima, Mission Veng leh Johny Lalhruaitluanga, College Veng, Aizawl an ni a; pawlah General PYD (NEI) Environmental Protection Committee leh Champhai Nature Conservancy (CNC) niin, khuaah Sailulak (Serchhip district) leh Sairêp (Lunglei district) an ni. Chawimawina dawngtute hnenah hian thuchei leh Rs 1,00,000 ṭheuh hlan a ni.

Chawimawina hlan inkhawmah hian LUF president Lalthara'n thu sawiin, nungcha humhalhna lama hma la ṭhate bakah, theihna nei ṭha zirlaite ṭanpui nan LUF-in hma a la ṭhin a, chu'ng atan chuan cheng nuai 50 vel an pe chhuak tawh tih a sawi.

LUF hi kum 2023-ah din niin, kum 2023 aṭanga kumin thlengin Thilsiamte Chhantu Chawimawina hnuaih hian mimal/pawl/khua 22 hnenah chawimawina an pek tawh bakah, zirlai pathum (engineer, doctor leh nurse)-te zirna puih nan Rs 6,99,000 leh zirna lama puih ngai nia an hriatte puih nan Rs 2,40,000 an pe tawh a; damlo leh ṭanpui ngaite puih nan Rs 17,55,000 vel an seng tawh bawk.