KHAWTHLIR

Speaker tel

Nimin khan Samvidhan Sadan, Parliament House Complex, New Delhi-ah '28th Conference of Speakers and Presiding Officers of the Commonwealth' buatsaih a ni a, Mizoram Assembly speaker Lalbiakzama, deputy speaker Lalfamkima leh Legislative Assembly additional secretary Lalthangmawia te an tel. CSPOC hi kum 1969-ah neih ṭan a ni a, tun ṭum hi a vawi 28-na leh India-in a thlen ṭum lina niin, prime minister Narendra Modi-a'n a hawng. Commonwealth ram 53 aṭangin palai ṭhahnem tak an tel a, Lok Sabha speaker Om Birla-a'n a kaihruai a ni.

AR-in meth man

Assam Rifles chuan January 14, 2026 khan Zemabawkah Lalrinchhana, Chaltlang nia inchhál hnen aṭangin methamphetamine kg. 9.8 an man. Ruihhlo an man hi Narcotics Control Bureau field office-ah an hlan a ni.

Mizoram CSR Connect portal

Mizoram CSR Cell chu an chairman TBC Lalvenchhunga, MLA hoin January 14, Thawhlehni khan online hmangin an ṭhukhawm. NGO leh company-te corporate social responsibility chungchanga awlsam zawka an thawhho theihna tur leh thlun zawmna tura duan 'Mizoram CSR Connect Portal' chu January 27, 2026 khian hawn an rel.

Ramri kawng

Serchhip DC Paul L Khuma hoin January 14, Thawhlehni khan a pisaah Mizoram leh Myanmar ramri, Sailulak - Indo Myanmar Border kawng sial chungchang sawiho a ni. Sorkar laipui duh dan angin Myanmar leh Mizoram inrina zir chian a ni a, Serchhip district-a Revenue department aṭangin surveyor te, Border Road Organisation te, District Administration aiawhten a hmunah joint survey an nei tawh a; ṭhutkhawmah hian hmalak zel dan tur sawiho a ni.