Grassroot Cricket School Tournament kharna Education Minister-in a hmanpui

School Education minister Dr Vanlalthlana chuan nimin khan 3rd MAP Ground, Mualpuiah Cricket Association of Mizoram (CAM) leh Samagra Shiksha, Mizoram ten Grassroot Cricket School Tournament an huaihawt khârna a hmanpui.

Dr Vanlalthlana chuan, zirlaite chu tumruhna nen hma lam hun hmachhawn turina a chah a, "India ram cricket-a in lan chuan khawvel huapah in lang nghal dawn a, CAM nen kum 5 chhung thawhhona neih a nih chhungin thil ṭha tam tak kan hmu a ni," a ti a; zirlaite chu cricket khelh bànsan mai lo a, a bulṭhut thiamna nei tur leh zirna pangngai thlahthlam loa ngai pawimawh zel turin a chah.

Grassroot Cricket School Tournament-ah hian Aizawla sikul 10 aṭangin mipa leh hmeichhe team pakhat ṭheuh leh, Serchhip district-a Midland Comprehensive School aṭangin mipa team an tel. Hmeichhiaah Nepali Middle School an champion a, mipaah Midland Comprehensive School an champion a ni.

Grassroot Cricket School atan hian CAM leh Samagra Shiksha chuan April 12, 2022 khan thawhhona thuthlung an ziak a, cricket zirna atana mamawh zawng zawngte CAM-in an tum a, zirlai leh sikul lama buaipui ngai awm apiang Samagra Shiksha-in a buaipui thung. Cricket zirna atan hian Aizawla middle school 10 leh Aizawl pawn district pathumah sikul pakhat ṭheuh thlan a ni.