ICT hmalakna leh hmachhawp sawiho

Information & Communication Technology minister Dr Vanlalthlana kaihhruaiin January 14, Thawhlehni khan ICT conference room-ah kum hnih chhunga ICT department hmalaknate leh hmachhawpte thlirho a ni.

Ṭhutkhawmah hian, project kal lai mek zawh thuai a nih theih nan hun bituk siam a ni a; hmalakna kal meka harsatna hrang hrangte chinfel dan tur leh, data policy leh data security ṭha zawk neih tuma hmalak a ṭul thu sawi a ni. Sorkar aṭanga khua leh tui hnena service (government to citizen service) awlsam zawka pek a nih theih nan ruahmanna siam ni se, an ti.

Tarlan danin, ICT department hmalaknain Mizo Fiber Grid project hnuaiah Mizorama district leh block headquarters hrang hrangte chu internet hrui hmanga thlun zawm a ni a; Secretariat-a file zawng zawng chu e-office hmanga kalpui a ni tawh. Directorate leh district office-ah e-office hi kalpui tum mek a ni a, ICT Directorate chuan e-office an hmang tawh a ni.

Artificial intelligence (AI) hmanga Mizo ṭawng humhalhna tur leh ṭawng lehlinna project Bhashini hmalakna kal mek bakah, office data hlui vawn ṭhatna 'Digitization of Legacy Data' kalpui mek a ni a; ICT department leh an hnuaia Mizoram State e-Governance Society (MSeGS) siam software leh mobile app hrang hrangte thlirho a ni bawk.