Gas bûk tling chauh hralh turin hriattir

Food, Civil Supplies & Consumer Affairs (FCSCA) department chuan thupek chhuahin, eirawngbawlna gas (LPG) bûk tling ngei chauh mipui hnenah sem chhuak turin LPG distributor-te a hriattir a; thupek zâwm lote chu dan anga hrem an nih tur thu a tarlang.

FCSCA chuan, LPG distributor-te'n gas cylinder a tak awm an dawn apiang a rih zawng (weightment) endik vekin, a bûk dik chauh an kudamah an dah tur a nih thu a tarlang a, "Kudam aṭang chauhin mipuiah an sem chhuak leh tur a ni. An pek chhuah/sem chhuah leh dawnin Marketing Discipline Guidelines clause 1.4 (d & f)-in a phût angin 'gas bur tak awm bûk dik tak chauh an phur chhuakin bûkna dik thlap (correct weighing equipment) an keng tel ang a, customer hmuh lai ngeiin a dik leh dik loh an bûk leh tur a ni' tih hi an zawm ngei tur a ni," a ti.

Order hi tun thlenga la zâwm ṭha duh lo gas distributor an la awm tih hriat a nih thu tarlangin FCSCA chuan, "He thuchhuah aṭang hi chuan an zawm ngei ngei tur a ni," a ti a; zawm ṭha duh lo an la awm a nih chuan an chungah dan anga action lak a nih tur thu a tarlang a ni.