Ramri hung duh loh vangin pungkhawm

Mizo Zirlai Pawl (MZP) leh Zo Re-Unification Organisation (ZORO) chuan India sorkarin India (Mizoram) leh Myanmar ramri hung a tum an duh lohna lantirin nimin khan Vanapa Hall kawtah 'Border fencing duh lohna punkhawm' an huaihawt a; Mizoram Governor kaltlangin Prime Minister hnenah lehkha an thehlut nghal.

Punkhawmah hian Chin state leh Mizoram inkara ramri hung duh lohna thuziakte kengin, India-in ramri hung a dum chu bànsan se an duh thu te, Zo fate inṭhen darh an duh loh thu leh insuihkhawm an duh thu te, ramri hung chu an dodal zel dawn thutein an au rual a ni.

ZORO president R Sangkawia chuan, Indo-Myanmar ramri hung chu a tawp thlengin an dodal dawn tih a sawi a, "Mizoram sorkarin February 28, 2024 khan ramri hung duh lohna official resolution a siam a, hei hi vawiin thlengin ṭhiah a la ni lo. Resolution hi kengkawh zel turin sorkar kan ngen a, kan thláwp tlat dawn a ni," a ti.

MZP president Dr C Lalremruata chuan, India sorkarin rambuai vanga Myanmar aṭanga India (Mizoram)-a rawn lutte chhuanlama hmanga Mizoram ram ṭha lai zawng zawngah ramri hung a tum chu an hrethiam thei lo tih a sawi a, "Ramri hi mihring siam chawp a ni a, Pathianin Zo fate ram leh hnam min dinsak a, rorelna pakhat hnuaia awm kan duh mek laia ṭhen darh zawnga daidanna bang siam a ni tur hi kan pawm thei lo," a ti a; Zo fate duhna hriaa ramri hung tum ṭhulh turin India sorkar a ngen.

MZP leh ZORO hian ramri hung chungchang ngaihtuah nawn tura prime minister Narendra Modi ngenna lehkha nimin tlaiah khan Mizoram Governor kaltlangin an thehlut a, a copy Union Home Minister an pe bawk.