Mizoram mawina pho lan thiam leh khualzin dawnsawn thiam a pawimawh - Tourism Minister

Mizoram Tourism Service Association (MTSA) chuan nimin khan Tourist Lodge, Chaltlangah infuihna hun an hmang a; khuallian Tourism minister Lalnghinglova Hmar chuan, tourism hmasawnna atana pawimawh ber chu ruhrel din lam ni loin, Mizoram mawina pho lan thiam leh khualzin dawnsawn thiam a nih thu a sawi.

Tourism Minister chuan, kumin chhungin tourism chungchanga mipui inzirtirna, inzirna leh inràwnkhawmna uar zawka kalpui a nih tur thu sawiin, "Tun hnaiah tourism hmasawnna tur infrastructure project atan sum beisei kan nei nual. A pawimawh ber chu infrastructure lam ni loin, kan ram mawina pho lan thiam leh khualzin dawnsawn thiam a ni," a ti a; khualzin dawnsawnah ṭan la zel turin Tourism department-a thawkte a fuih.

Mizoramah khualzin an pung chu lawmawm a tih thu leh mipui náwlpui pawh an lawma a hriat thu sawiin Lalnghinglova chuan, "Hei hian kan economy pawh a ṭha zawngin a nghawng ang. Tourist-te hian thil ṭha chauh ni lo, thil ṭha lo pawh an rawn luhpui châng a awm dawn a, thil ṭha lote pawh kan lo dawngsawng thiam a, tourist-te nena chenho kan thiam a pawimawh a, inzirna uar zawka kalpui a ngai a ni," a ti.

Tourism Minister chuan, tourism chu mi tin khawih a nih avangin department mal beih chi a ni lo tih sawiin, "Ṭanrualna tur a ni. Kum khat chhunga khualzin hîp thei tur calendar kan siam hi a ṭangkai dawn a; khualzinte'n zin chhan an neih zel theihna turin event tam zawk buatsaih kan tum," a ti a; event buatsaihah zawi zawia hma an sawn thu a sawi.

Lalnghinglova Hmar chuan, tun hnaiah khawtlang nen ṭangruala community based tourism kalpuinaah hlawhtlinna an hmu chu a lawmawm a tih thu sawiin, "Community based tourism-ah a hlâwkna hi khaw neitute'n an tèl zelna turin kan ruahman dawn," a ti a; Winter Festival lian zawk leh huam zau zawk buatsaih tum a nih thu a sawi bawk.

MTSA infuihna inkhawm hi Tourism director R Lalrodingi'n a kaihruai a; Tourism department hnuaia thawkte telin, chawhnu lamah ro an rel a ni.