Mizoramin infiamna tihhmasawnnaa hma la ṭha chawimawina a dawng

January 15, Ningani khan India International Centre, New Delhi-ah 'Global Sports Education Convention 2026 and National Awards Ceremony' buatsaih a ni a; Mizoramin infiamna lama hma la ṭha chawimawina a dawng.

National Awards Ceremony-ah hian India rama sport leh physical education huanga ti ṭhate hnenah National Sports and Physical Education Awards sem a ni a; Mizoram chuan infiamna chawikân leh tihhmasawn lama hma la ṭha, 'Best Upcoming State Promoting Sports and Physical Education' chawimawina a dawng. Chawimawina hi Mizoram sorkar aiawhin Sports & Youth Services joint secretary H Dolianbuai'n a dawng a ni.

Global Sports Education Convention-ah hian mithiamte leh state hrang hrang aiawhte’n India rama infiamna leh physical education hmasawnna tur an sawiho a; sawiho zingah India-in Commonwealth Games 2030 a thlen tur chungchang pawh a tel.

Mizoram sorkar chuan Olympic 2036 thlir chungin Empowering Mizoram Sports (EMS) a duang a, January 14, 2025 khan Chief Minister-in a hawng. EMS hnuaiah hian Mizoram khaw hrang hranga naupang kum 8-15 inkarte chu Olympic discipline ṭhenkhatah ni 15 (darkar 45) chhung zirtir an ni dawn a; theihna leh thiamna nei ṭha zualte chu residential training neihpui chhunzawm a ni ang. 

EMS hi Mizorama khaw kilkhawr ber thleng pha tura duan a ni a; public private partnership (PPP)-a kalpui tur niin, sorkarin coach leh hmanrua a tum ang a, coach duh khua/vengte'n coach-te veivahna, thlenna leh ei leh in an tum thung dawn a ni.

INFIAMNA LAMA HMALAKNA ṬHENKHAT

☐ EMS hnuaiah December 1-5, 2025 chhungin trainers training neih a ni. December 15-18, 2025 chhungin Prof. Masamitsu Ito, Nippon Sports Science University, Tokyo-in Hawla Indoor Stadium-ah coach te thil pawimawh a zirtir.

☐ Mizoram State Sports Council leh Samagra Shiksha ten May 1, 2025-ah Grassroots Sports Development Program (GSDP) atan thawh dunna thuthlung (MoU) an ziak a, a taka kalpui turin Sports minister Lalnghinglova Hmar-in August 21, 2025-ah a hawng.

☐ GSDP hnuaiah Mizorama centre 46-ah kum 6-14 inkar zirlai 1,000 chuang discipline thlan bikah zirtir an ni a, theihna leh thiamna nei ṭha zualte tan kal zel turtur kawng ruahman a ni.

☐ Tuipuiral Annual Sports Meet 2025 leh Tuichangral Games 2025-ah mumal zawka talent hai chhuahna neih a ni. Olympics 2036 thlir chungin Tuipuiral Games-ah boxing leh archery telh thar a ni a, Tuichangral Games-ah kum 8-16 inkar tan boxing, wrestling leh weightlifting telh thar a ni.