MCS Combined Main Exam-ah 66 tling

Mizoram Public Service Commission chuan Mizoram Civil Services (Combines Competitive) Main Examination 2025 result nimin khan a tichhuak a, personal interview hmachhawn turin mi 66 an tling.

MCS (Combines Competitive) 2025-ah hian October 22-30, 2025 chhunga Main Examination-ah mi 320 an inlan a, chu'ng zinga mi 301 chu exam tluanin, mi 19 an exam tluan lo. Mi 301 aṭangin personal interview hmachhawn turin mi 66 an tling a ni.

Tling zui ta mi 66-te chu January 22-23, 2026 chhungin an hriselna dinhmun enfiah a ni ang a, medical exam paltlangte'n personal interview an hmachhawn thei ang. Interview hun tur erawh tihchian a la ni lo.

MCS (Combines Competitive) 2025-ah Mizoram Civil Services atan mi 15, Mizoram Police Services atan mi pariat, Mizoram Information Services atan mi pariat leh, Mizoram Finance and Accounts Services atan mi pahnih lak a ni dawn a ni.