Uniform ni lo thawmhnaw lum dang hâk phalsak turin sikul zawng zawng hriattir

School Education department chuan, thlasik khaw vawh lai a nih avangin zirlaite chu an school uniform bakah kawr lum dang hâk phalsak turin Mizorama sikul zawng zawng a hriattir. Hei hi February 27, 2026 thleng atan tih phawt a ni.

School Education director Angela Zothanpuii chuan January 15, 2026 khan hriattirna (circular) a tichhuak a; "Khawvel sik leh sa inher danglam zela thlasik na takte kan tawn chhoh zel avangin sikul naupangte hriselna leh hmakhua thlirin, School Education department hnuaia school awm zawng zawng, government, government aided leh private school te chuan school uniform bakah thawmhnaw lum naupangte'n an hâk phalsak turin kan inhriattir," a ti.

Education Director chuan, "School zawng zawngte'n naupangte lum nan uni-form an hâk piah lamah stockings, leggings, thermal thawmhnaw leh thawmhnaw lum dangte an hâk an phalsak thei," a ti. "Uniform piah lama thawmhnaw dang naupangte'n intihlum nana an hâl avanga thil hrang hranga inthleina awm lo tur bera uluk taka kengkawh tura ngen leh hriattir kan ni e," a ti bawk.

Director tarlan danin, naupangte'n thawmhnaw lum dang an hâ a nih pawhin rualkhai zawka uniform zahawmna kenkawh a nih theih nan thawmhnaw lum an hakte chu zahawm leh school nena inrem a ni tur a ni a; rawng thim lam hak tura ràwn an nih rualin, a rawng chu sikul zalennaah dah a ni.