KHAWTHLIR

MUHCS zawm thar

Mizoram Universal Healthcare Scheme-a thawkho turin Mizoram State Health Care Society (MSHCS) leh Global Health Pvt Ltd., New Delhi chuan nimin khan MSHCS pisaah thuthlung an ziak. Global Health hnuaiah hian damdawi-in paruk a awm a; chu'ngte chu - Gurugam (Gurgaon), Lucknow, Noida, Ranchi leh Indore-a Medanta Hospital te bakah, Jay Prabha Medanta Superspeciality Hospital, Patna-te a ni.

Lungleiah ILP endik

Inner line permit (ILP) endik tura din Lunglei district Inspection Team chuan nimin khan Lunglei Municipal Council (LMC) huam chhunga hnam dangte ILP an endik. Inspection Team hi hmun hnihah inṭhenin hnam dangte an endik a; LMC chhunga veng hrang hrangah hnam dang, ILP felfai lo mi 20 an hmu chhuak. ILP fel lo neite chu dan anga ILP tinung tur leh thuneitute hmaa inlan turin an hriattir a ni.

Exposure visit

Farmers Producer Company (FPC) pali - Tlaizawng, Serlui, Langkaihruam leh Zotui FPC-te chuan nimin khan KVK, Kolasib-ah Exposure Visit cum Training an nei. KVK, Kolasib head Dr Michelle C Lallawmkimi kaihhruaiin agronomy, horticulture leh home science-ah te hriat tur pawimawhte inzirtir a ni a; KVK Kolasib demonstration farm an tlawh bawk. FPC pali-ah hian loneia eizawng mi 559 an tel a ni.

Apex Bank thar

Mizoram Cooperative Apex Bank branch 34-na, Saikhamakawn Branch thar chu nimin khan Cooperation secretary Udit Prakash Rai-in a hawng a; bank thara ATM booth dah thar chu Cooperative Societies registrar John LT Sanga'n a hawng bawk. Hawnna inkhawm hi MCAB chairman Lalnunsanga’n a kaihruai a, AMC-a bialtu corporator Dr C Malsawmtluangi pawhin thu a sawi a ni.

ṬKP-in thisen pe

ṬKP, Hauruang Pastor Bial chuan nimin khan Hauruang community hall-ah thisen pek an huaihawt a, Lunglei Civil Hospital tan thisen unit 21 an pe a, petute mipa 15 leh hmeichhia paruk an ni.