NIELIT-in Job Fair 2026 an buatsaih

National Institute of Electronics and Information Technology (NIELIT) chuan nimin khan Millennium Centre chung zawlah NIELIT Job Fair an buatsaih a; Labour, Employment & Entrepreneurship Department (LESDE) secretary Dr Lalhriatzuali Ralte-in a hawng.

NIELIT Job Fair 2026 hi ni khat awh a ni a; company hrang hrangin stall 14 an hawng a, ṭhalai hna zawng lai 300 velin an chhim a ni. Job Fair-ah hian hna zawnga kal ṭhalai zinga 32 chu interview aṭangin lak nghal an ni a; round dang hmachhawn leh tura shortlist-a dah mi 94 an awm bawk.

Dr Lalhriatzuali Ralte chuan, Mizoram sorkarin kutkawih eizawnna lam a ngai pawimawh hle tih sawiin, "Handholding aṭangin project a siam theih a, hemi lamah hian ṭhalaite'n ngaihtuahna kan sêna kan bawhzui a ngai. Mi hausa leh hlawhtlingte hi an ngaihtuahna leh suangtuahna zahpui lo a, hmasawn tura theihtawp chhuah an ni a, Mizo ṭhalaite pawhin kan idea neihte a taka tihlawhtling turin theihtawp kan chhuah a ṭul," a ti.

Tun hnaiah Ministry of External Affairs aṭangin LESDE-in recruiting agency license an neih thu sawiin Dr Lalhriatzuali chuan, "He license hmang hian Mizo ṭhalai Mizoram páwna hna thawk duhte state pawna agency-te zuk tihbuai ngai tawh loin kan thawn chhuak thei dawn," a ti a; ṭhalaite chu ram innghana leh beiseina an nih avangin theihtawp chhuaha ram leh hnam tan ngaihtuahna sênga hma la turin a chah.

NIELIT director Dr T Gunendra Singh pawhin thu sawiin, NIELIT chu deemed to be university a nih thu leh university puitlingah hlan kai thuai an beisei thu a sawi a; Mizo ṭhalaite'n Mizoramah chauh hna zawng lo a, state pawna job fair leh a kaihhnawih dangte an ngaihven tel a ṭul thu a sawi.

NIELIT hi sorkar laipuia Ministry of Electronics and Information Technology-in a din a ni a, Delhi-ah hmunpui neiin, state hrang hrangah centre 47 a awm. NIELIT, Aizawl hi kum 2001 khan Zuangtuiah din a ni a, kum 2013 khan Lunglei Pukpuiah Extension Centre din a ni. NIELIT Aizawla computer zirna course fee zawng zawng hi schedule tribe (ST) leh schedule caste (SC)-te tan sorkar laipuiin a tumsak vek a, Mizoram Scholarship Board aṭangin scholarship an dawng bawk.

Diploma, BCA, MCA, MSc (electronics), DCSE, DETE, M.Tech in Computer Science & Engineering (artificial inteligence & machine learning), B.Tech in Computer Science & Engineering (artificial inteligence & machine learning) leh B.Tech in Electronics (internet of things)-te bakah long term non-formal course - NIELIT ‘O & A’ level te, short term course - CCC, tally, COAITA leh NSQF course-te zir theih a ni.