Mock exercise ṭha ber pawl a ni - NDMA

National Disaster Manage-ment Authority (NDMA) leh Disaster Management & Rehabilitation (DMR) department ten January 15, Ningania 'Mock Exercise on Earthquake’ an buatsaih chu Ningani zan khan DMR minister Prof. Lalnilawma hoin thlir lêt nghal a ni. NDMA hotute chuan, mock exercise ṭha leh hlawhtling ber pawl a nih thu an sawi.

Thlir letna hi district tina DDMA-te'n video conference hmanga an chhim a, mock excercise an kalpui dan leh mock excercise aṭanga an thil zir chhuah leh hmasawn ngaihna lai leh rawtna an neihte sawiho a ni.

Prof. Lalnilawma chuan, Mizoram sorkara department hrang hrang te, sorkar laipuia agency hrang hrangte leh tlawmngai pawlte inkarah thawhhona ṭha a awm avangin mock exercise hlawhtling tak neih a nih thu a sawi a, "Bureau of Indian Standard-in seismic zonation a tihchhuah thar berah India hmarchhak pum hi zone 6-ah a awm avangin lirnghing a lo thlen thulha chet lâk dan tur inzir leh enchhin hi a pawimawh a ni," a ti.

Khuarel chhiatna thleng thei hriat lâwkna (early warning sytem) neih ve a pawimawh thu sawiin DMR Minister chuan, chhanchhuah leh chhawmdawl hna thawhna tura hmanrua kan neih sate bakah, a aia ṭha lehzual zawkte pawh neih belh ni se a duh thu a sawi.

NDMA senior consultant Brig. Ravinder Gurung chuan, mock exercise-a tel zawng zawngte'n tih tak zeta an mawhphurhna an hlen chu a lawm thu sawiin, "Mock exercise ṭha leh hlawhtling ber pawl a ni a, sorkar laipui hnuaia agency hrang hrang te, department hrang hrangte leh tlawmngai pawlte zingah thawhhona ṭha tak ka hmu," a ti a; Mizorama khuarel chhiatna thleng thei zinga hlauhawm ber chu lirnghing a nih thu a sawi bawk.

Chief observer PC Lallawmsanga chuan mock excercise a hmuh dan leh rawtna a neihte a sawi a; DMR secretary Udit Prakash Rai pawhin thu a sawi a ni.