Thlai hralhnaa hmalak zel dan tur sawiho

Mizoram State Policy Coordination Committee vice chairman Dr KC Lalmalsawmzauva, adviser to CM (Handholding) hoin January 15, Ningani khan Mission Organic Mizoram (MOM) hnuaia farmers producer company (FPC) zinga sawhthing, Mizo hmarcha leh aieng chîngtute'n an thlai (organic) tharte hralhnaa hmalak zel dan tur an sawiho.

Sawihona hi Irrigation and Water Resources auditorium-ah neih a ni a; district hrang hranga MOVCD-NER kaltlanga din organic FPC zinga sawhthing, Mizo hmarcha leh aieng chingtute an tel a ni.

Dr KC Lalmalsawm-zauva chuan, kut hnathawktute zingah sorkar puihna dawn chhunga nung, sorkar aṭanga puihna a tawp ruala tawp ve mai an awm ṭhin chu ṭha lo a tih thu a sawi a, "Political party hrang hrangin kan ramah sorkarna an siam tawh a, tuna sorkar pawh hi hlun tur a ni lo a, a la tla ve leh ngei ang. Sorkar an tlak rual hian loneitute kalphung dik nei tura sorkarin a ṭanpui mekte hi in tawp ve mai tur a ni lo," a ti.

Agriculture & Farmers Welfare secretary Ramdinliani pawhin thu sawiin, organic product chu thlai dang aia hlu bik a nih angin a man pawh a to bik tur a nih thu leh a hralhah pawh FPC-te inlungrual a ṭul thu a sawi a, "Kum kal taa kalphung fuh tâwk lote aṭanga inzir fingin hma kan sawn a ṭul," a ti a, scheme a tawp ruala tawp ve mai lo turin FPC-te a chah.

MOM hnuaiah hian phase 4-na kalpui mek niin, FPC 41 hnuaiah organic farmer 27,604 an awm a, ram hectare 26,500-a zauah hma an la a ni.

FPC-te chu an thlai tharte seng leh sawngbawlnaa pui turin Post Harvest Infarstructure ngaihtuahpui an ni a, chu'ng atan chuan collection centre 26, integrated pack house 15, small processing unit pakhat leh lirthei (transport vehicle) 11 pek an ni tawh.