KHAWTHLIR

Ruang hmu kim

January 9, 2026 tlai dar 3:30 vela Sihphir Neihbawiha quarry chimin a delhte ruang chu hmuh kim a ni tawh a; ruang hmuh hnuhnun ber chu nimin tlai dar 2:30 vel khan hmuh a ni. Tarlan tawh angin, quarry chim hian mi pali a delh a, pathum an thi a, pakhat chu damdawi-inah enkawl mek a ni.

Lengpui thlang

Associations of Physicians of India - Mizoram State Chapter, Research Society for the Study of Diabetes in India, Diabetes Research Welfare Associa-tion, American College of Physicians - India Chapter leh United Global Council for Cardiometabolic Diabetes te chuan khaw enkawl bik (adopted village) atan Lengpui an thlang a, January 16, 2026 khan Lengpui VC hall-ah hawn a ni. Village adoption hi kum thum chhung kalpui a ni ang.

MIZOFED coupon

MIZOFED petrol pump chuan cash coupon kalphung thar an hmang a, hei vang hian POL cash coupon hlui, thla 6 dam ang chi chu February 2026 thleng chauh hman theih a ni dawn tih an tarlang. POL coupon hlui (validity - thla 6) neite chu February 2026 ral hmaa hmang turin an chah a ni.

Heroin man

January 17, Inrinni khan Assam Rifles chuan Zotlangah Zokhawthar aṭanga Champhai lam pana tlan SML truck pakhat aṭangin heroin gram 174 an man a, lirtheia chuang Rodingliana (52), Tuirial nia inchhal leh Vansanga (35), Sairang niaa inchhal te an man nghal. AR-te hian truck hi ringhlelin an ûm a, Zotlanga workshop pakhatah ûm lutin Champhai police-te an pun a ni.

Roll endik sawiho

Khawzawl district bawrhsap K Vanlalṭhiana kaihhruaiin January 16, 2026 khan Election Commission of India-in electoral roll dik leh felfai zawk a awm theih nana India ram puma electoral roll thar a buatsaihna, Special Intensive Revision of Electoral Roll, 2026 a kalpui meka Khawzawl district-a hmalak dan tur sawiho a ni. Special Intensive Revision hi Bihar-ah zawh a ni tawh a, state dang 12-ah kalpui mek a ni.