MP-in ramri pawhtu tur kawng sial a enfiah

19th January, 2026

Rajya Sabha MP K Vanlalvena chuan January 15-16, 2026 chhung khan Thingsai-Bualpui-Saisihchhuah-Pangkhua-Sangau (TBSPS) kawngpui sial mek leh Tuipui-D lei (bridge) thar siam tur a enfiah.

Mizoram MP hi BRO executive engineer Vikash Kumar Singh leh OIC Shambu KR Tarun, ABCI Infrastructure general manager Prafulla Borgohain, Hnahthial VC, Thingsai VC, Bualpui VC leh tlawmngai pawl hruaitute'n an ṭawiawm a ni.

K Vanlalvena chuan, TBSPS kawng sial mekah Hnahthial district-a Bualpui H leh Lawngtlai district-a Pângkhua inkarah BRO-te'n zangnadawmna chungchanga harsatna an tawh avangin kum 2021-23 chhung hna an chawlhsan a, hna chhunzawm thuai a nih theih nan hma la tura sorkar laipui a ngen ṭhin a, hna chhunzawm leh a nih tawk thu a sawi.

Pangkhua leh Saisihchhuah inkar kawng laihna atana DoNER-in kum 2021-a cheng vbc 66 a pek tawh chu BRO-te'n hna an thawh loh avangin DoNER-in a hnuh kîr vek thu MP chuan a sawi a; Ministry of Defence-in Hnahthial district-a Bualpui H lam aṭanga kawngpui sial hna kum 2024 tawp lam aṭanga an chhunzawm leh thei ta chu a lawm thu a sawi bawk.

BRO hotute chuan, Pangkhua-Saisihchhuah kawng sial hna chu zangnadawmna pek zawh hnuah ṭan tum a nih thu leh, Pangkhuaa zangnadawmna pek turte chu thla hnih chhunga pek vek an tum thu MP an hrilh.

K Vanlalvena chuan, Thingsai leh Bualpui H inkar kawng blacktop loh (border road) km. 2-a thui la awm chu a ngaimawh thu sawiin, kumin fûr thlen hma ngeia lung (bolder) phah hman turin BRO hotute a hrilh. BRO hotute chuan, khawtlang hruaitute nen ṭangrualin an tih ngei tur thu an sawi a ni.

Rajya Sabha MP hian Bualpui H aṭanga Ṭiau leh Chhimtuipui lui infinna thlenga kawng laih mek a hmunah a tlawh a; Pangkhaw ram leh Bualpui H ram dawh zawmtu tur Chhimtuipui lui chunga lei (bridge) ban phunna tur leh, Hnahthial bul Darzo kai (Tuipui D)-a lirthei lian zawh theih lei dawh tura ban phunna tur a en bawk.

Chhimtuipui luia lei dawh tur pahnih hi metre 150 leh metre 255-a sei a ni a; cheng vbc 25 leh vbc 75 senga dawh tur niin, September 2027-ah dawh zawh hman tura ruahman a ni.