CADC enkawltu-in Chawngte a tlawh

Governor's Rule hnuaia Chakma Autonomous District Council (CADC) enkawltu (caretaker) Donny Lalruatsanga, Lawngtlai district bawrhsap chuan January 16, 2026 khan Kamalanagar-a CADC conference hall-ah CADC executive secretary Pronit Bikash Chakma leh officer dangte a kâwm.

Donny Lalruatsanga chuan, CADC caretaker a nih chhungin ṭha taka CADC sorkar kalpui a duh thu a sawi a; ADC chu kawng hrang hranga an huam chhunga hmasawnna thlentu a nih laiin, hmansual a hlauhawm thu sawiin, "Dik leh ṭangkai taka hman thiam a ṭul. Sorkara nihnate hi mimal hlâwk nan hman loh a ṭha," a ti a, mipui rawngbawltu an nihna hre reng tur te, an nun danah fimkhur tur te, ram leh hnam hmasawn nan theihtawp chhuah tur leh, an hlawhah lungawi thiam tur tein a chah.

Inkawmhonaah hian CADC-a department hrang hrang hotute'n harsatna an neihte Bawrhsap hnenah hian an thlen a; staff recruitment, muster roll leh provisional employee chungchang, CADC budget leh utilisation of local receipt chungchangte an sawiho a, a ṭul angin thuneitu sang zawkah thlen ni se, an ti.