DoNER secretary Chanchal Kumar-a'n Serchhip district-a hmalaknate a en

Development of North Eastern Region (DoNER) secretary Chanchal Kumar chuan January 16, 2026 khan Serchhip Kawlri tlânga Cultural Heritage Centre sak mek te, Thenzawla helipad & heliport siamna tur te, Thenzawl Peace City project hnuaia Greenfield Development siamna tur leh Handloom Cluster te a tlawh.

Kawlri Tlanga Cultural Heritage Centre sak mek hi North Eastern Council (NEC) aṭanga sum hmuh hmanga sak a ni a; September 2024 khan hna thawh ṭan niin, kumin kum bul lama zawh hman tura duan a ni. Project atana sum dah chu cheng vbc 4.31 a ni a, PWD hnuaiah Excell Consultancy Services-in an thawk a, hna thawh tur 65% zawh a ni tawh.

Cultural Heritage Centre saktu contractor chu a rang thei ang bera hna thawk zo turin Chanchal Kumar chuan a hrilh a; DoNER Ministry aṭangin sumah harsatna a awm loh thu sawiin, ṭangkai zawka hman a nih theih nan leh mipuiin an hlut zual theih nan trekking route siam dan tur ruahman tel ni se a duh thu a sawi.

Kawlri Tlang hi Zoluti (Mary Winchester) lak let lehna hmun a ni a; Serchhip Heritage Society chuan Mizo history vawn nunna tur te, zin mite hîp nan leh thing leh maute vawnhimna atan chei turin hma an la a, bialtu MLA chief minister Lalduhoma hmalaknain Cultural Heritage Centre sak mek a ni. Kawlri tlang aṭanga hla lo têah Chawngpuii Khawthlir leh Pastor Chhawna Ṭawngṭaina In siam a ni tawh bawk.

DoNER Secretary hi Planning & Programme Implementation secretary Lalmalsawma Pachuau, Serchhip district bawrhsap Paul L Khuma, additional DC Lalrinzuala leh mi pawimawh dangte'n an ṭawiawm a ni.