India rama lehkhabu chhiara inelnaah Mizorama sikul pahnih an che ṭha

India ram puma lehkhabu chhiara inelna, Reading Decathlon-ah Mizorama sikul pahnih - Mount Carmel School, Chaltlang chu pahnihna a ni a, La Montessori School, Mission Veng chu pathumna a ni.

Inelna hi Food4-Thought Organisation leh Monocept te buatsaih a ni a, Mizoram aṭanga telte hi Mizoram Youth Commission (MYC) kaltlanga tel an ni. Inelna hi level thum - state level, regional level leh national level te a awm.

State level inelna hi August 22, 2025 khan MYC-in an buatsaih a, sikul pali telin, zirlai pahnih zel an tel. Mt Carmel School aiawha tel Krista Roluahpuia Khiangte, pawl 9 leh Rebek Malsawmzuali, pawl 8-te chu pakhatna an ni a; La Motessori aiawha tel Malsawmhlui Pachuau, pawl 8 leh Joshua Lalawmpuia, pawl 8 chu pahnihna an ni. State level-ah hian lehkhabu 50 chuang chhiar tur pek an ni a, chuta ṭang chuan zawhna an chhâng a ni.

November 29, 2025 khan Indore, Madhya Pradesh-ah regional level inelna buatsaih a ni a, sikul 21 an tel a; lehkhabu 50 chuang chhiar tur bituk a ni. Northeast Region-ah La Montessori pakhatna an ni a, Mt Carmel School pahnihna an ni.

National level chu January 17, 2026 khan Hyderabad-ah neih a ni a, sikul 10 an tel. Mizoram aiawhte hi thlawhna thlawh loh avangin a hmunah an tel thei lo a, online-a an tel phalsak an ni. National level-ah hian lehkhabu 100 chuang hret hmangin an inel a; Mt Carmel School aiawha telte pahnihna niin, La Montessori aiawha telte pathumna an ni.