Ramri khuate tihhmasawnna tur sawiho

Rural Development & Administration (RDA) department hmalaknain nimin khan Planning conference Hall-ah India ramria thingtlang khuate tihhmasawnna tur chungchang zirchianna leh sawihona, ‘Workshop on Vibrant Village Programme-II buatsaih a ni a, RDA minister Prof. Lalnilawma’n a hmanpui.

RDA Minister chuan, VVP-II chu Mizoram tan a pawimawh tih sawiin, "Ram himna leh hmasawnna thlentu pawimawh a ni. Mizoramah kum 1993 aṭang tawhin Border Area Development Programme hmangin ramria khuate tihhmasawnna turin hmalakna kalpui a lo ni tawh a, tun thlenga hmasawnna kan hmuhte erawhin duh-thu a la sam tâwk lo," a ti.

Prof. Lalnilawma chuan, VVP-II hnuaiah Mizorama RD block 16-a khaw 109-te chu Ministry of Home Affairs-in Vibrant Village Programme kalpuina atan a thlan thu sawiin, "Hmarchhak state zingah khaw thlan chhuah tam berna pawl kan ni," a ti a, ramri hnaih khuaah hmasawnna hmuh a nih dawn thu a sawi.

Zirhonaa tel officer-te chu ramria khuate hrisel, khaw intodelh leh hmasawn (vibrant village) an nih ngei theih nana ngaihtuahnate sêng a, tih tak zeta hma la turin RDA Minister chuan a fuih bawk.

VVP hi sorkar laipuiin ramria awm khuate tihhmasawnna atana hma a lakna a ni a, kum 2023 khan VVP-I kalpui ṭan a ni. VVP-I chuan India-China ramria awm khuate a huam a, VVP-II chuan India-Myanmar leh India-Bangladesh ramria awm khuate a huam thung.

State 15 leh UT pahnihah VVP hi kalpui tur a ni dawn a, kum 2023-24 aṭanga kum 2028-29 thlenga thawh tur ruahman a ni. Hmalakna atan cheng vbc 6,839 ruahman a ni a, sorkar laipuiin a tum vek dawn. Mizoramah chuan district pariata RD block 16 hnuaia khaw 109-ah hmalak a ni ang.

VVP hnuaiah hian fûr leh ṭhála lirthei tlan theihna kawng siam te, inbiakpawhna tihchangtlun te, television leh electric connection (on-grid connectivity) tihṭhat te chu ngaih pawimawh hmasak a ni dawn a ni.