PM Vishwakarma inhrilhfiahna buatsaih

Nimin khan Hnahthial DC Conference Hall-ah PM Vishwakarma scheme chungchang leh MSME hnuaia scheme hrang hrang inhrilhfiahna hun hman a ni a, Hnahthial bawrhsap K Vanlalruati'n a hmanpui.

PM Vishwakarma hi Ministry of Micro, Small & Medium Enterprises (MSME), Ministry of Skill Development & Entrepreneurship (MSDE) leh Department of Financial Services (DFS) hnuaia awm a ni a; Mizoramah chuan Commerce & Industries department-in an enkawl.

Awareness programme-ah hian PM Vishwakarma-a inziak lut, training nei tawh vishwakarma 83 an tel a;

K Vanlalruati chuan, vishwakarma-te chu scheme hlawhtlin leh tlin loh innghahna an nih thu sawiin, theihtawp chhuah turin a chah a; scheme chu Mizo hnam ziarâng pho chhuah leh humhim nan a pawimawh thu sawiin, belhchian dâwl, rintlak leh tlo ni ngei turin a fuih.

Hnahthiala Commerce & Industries officer HB Lalrem-mawia'n PM Vishwakarma bakah, CI department hnuaia scheme hrang hrangte a sawifiah a; Hnahthiala lead bank (SBI) manager R Lalmalsawma, Indian Postal Bank executive manager Vanlalmawii leh Dr C Hmingsangzuala ten thil pawimawhte an zirtir a ni.

Scheme hnuaiah hian kum 18 tling tawh, sorkar laipuiin traditional trade a tih 18 zinga mi kut themthiamna nei, sorkar hnathawk ni lo chhungkua aṭangin mi pakhat ṭheuh ziahluh theih an ni a; loan Rs 3,00,000 thleng a pung tlem zawka lak theih a ni.

PM Vishwakarma chung-chang inhrilhfiahna hi Januatry 16, 2026 khan Kolasib-ah buatsaih a ni a, district dangahte buatsaih a ni tawh bawk.