Hriselna dinhmun enfiahna hmunte Dan anga khuahkhirh dan tur sawiho

Lunglei district-a hriselna dinhmun enfiahna leh inentirna - clinical establishment (CE)-te dan anga chhinchhiah leh khuahkhirh tura din District Registering Authority (DRA) chu chairperson Rochuangkimi Khenglawt, additional DC kaihruaiin nimin khan an ṭhukhawm.

Ṭhutkhawma tarlan danin, The Clinical Establishments (Registration and Regulation) Act, 2010 behchhanin Mizorama clinical establishment-te chhinchhiah, khuahkhirh leh vil zuina tur, The Mizoram Clinical Establishments (Registration and Regulation) Rules, 2014 hman a ni. Damdawi-in, clinic leh laboratory-te chu DRA-ah inziah luh vek tur a ni a, a him chin leh pawm theih chin (minimum standard) an phak ngei a ṭul.

Lunglei District SCMO pisain an chhinchhiah danin, Lunglei district-ah sorkar hriatpui clinical establishment 59 a awm mek a, 15 chu sorkar enkawl (district hospital, community health centre leh primary health centre) niin, a dang 44 chu mimal din (private) damdawi-in, clinic leh laboratory a ni. Damdawi-in 19, clinic 21, dental clinic 12, physiotherapy clinic pahnih leh diagnostic laboratory & imaging centre panga a awm.

Nimina meeting-ah hian DRA ṭhutkhawm hmasaa thu dahte bawhzui dan leh December 3-5, 2025 chhunga Lungleia non-governmental clinical establishment-te endik chungchang thlirho a ni a, hmalak zui dan tur sawiho a ni.

Damdawi-in thli leh bawlh-hlawh - bio-medical waste sawngbawl leh thehthang chung-changah, him leh felfai zawka thehthang a nih theih nan clinical establishment-te'n Mizoram Pollution Control Board (MPCB) aṭanga phalna an neih a ngai a; authorisation dil mek leh la nei lote chu authorisation nei thuai tura hriattirna pek nawn ni se, an ti.