Ombudsman-ah complaint 76 a lut tawh

Khawtlang rorelna, village council leh local council rorel dan leh hmalaknaa lungawi lohna neite tana zualkona Ombudsman-ah kum 2013 aṭanga nimin thleng khan thubuai (complaint) 76 a lut tawh. Ombudsman C Lalthanmawia, IPS (Rtd) chuan Ombudsman hmang ṭangkai turin mipui a chah.

Ombudsman (Independent Civil bodies for the State of Mizoram) C Lalthanmawia hian nimin khan a pisaah thuthar thehdarhtute thingpui a inpui a; Ombudsman State of Mizoram dinhmun a sawifiah. Ombudsman chu VC leh LC te rorel dan, kalphung leh hmalak dana sawiselna leh lungawih lohnate thlenna a nih thu sawiin, October 25, 2013-a din a nih aṭanga nimin thleng khan complaint 76 a luh tawh thu a sawi.

C Lalthanmawia chuan, mipuite'n tualchhung rorelnaah thil dik tawk lo an hmu a nih chuan Ombudsman-ah kal nghal loin, tualchhung thuneitu VC/LC hnenah thlen phawt tur a nih thu a sawi a, "Thla khat chhunga hmalakna a awm lo a nih chuan Ombudsman-a kal chauh tur a ni. Ombudsman-a complaint lut reng reng chu chhui chiang tur leh a ṭul anga hma la turin civil court tlukpui thuneihna a nei a, a ṭul angin thubuai a chingfel thei," a ti.

Press mite zawhna chhangin C Lalthanmawia chuan, complaint lut tawh zingah political party anga zualkona a tam ber tih a sawi a, "ZPM sorkar hnuah thubuai dawn kan la nei lo," a ti. Thubuai an dawnte chu a tlangpuiin tualchhung rorelna kal dik lo chungchang te, sum hman dan dik lo leh state sorkara rorel laiin chhan eng emaw vanga opposition VC-te ṭhiat tura hma a lakna te a nih thu a sawi.

State Ombudsman sawi danin, tun hnai deuhah Champhai district-a kawngpui laih turah VC pakhatin house site pass lem siamin, zangnadawmna cheng nuai 800 chuang an la a; hemi chungchang hi Ombudsman-a thlen niin, chhui a ni a, a mawhphurtute chu an sum dawn tawh chu rulhtir leh vek a ni.

C Lalthanmawia chuan, Mizoram State Ombudsman chu mahnia ro inrel, independent local body a ni a, mahse, tunah chuan a nih tur ang a la ni lo nasa tih a sawi a; budget hran nei loin department pathumin an hmui thu te, secretary awm tur a nih laiin thawktu mi pali - LDC level pahnih leh 4th grade pahnih chauh an la neih thute a sawi bawk.