Lawngtlai district-a dan loa lutte endik rêl

Nimin khan Lawngtlai DC conference hall-ah bawrhsap Donny Lalruat-sanga hoin Lawngtlai district-a dan loa lutte leh sumdawngte chungchang sawiho a ni a; dan loa Mizorama lut an awm leh awm loh endik an rel.

Lawngtlai Bawrhsap chuan, an district-ah tun dinhmunah dan loa lut leh sumdawng an tam thu a sawi a, "Hei hi vei tham a ni. Home department aṭang pawhin hemi kawnga hma la tura lehkha hmuh a ni. Sorkar angin hma kan lak a ngaih mai bakah, nakin zela kan district leh kan ram tan nghawng nei tur thil a nih avangin NGO, VC, police leh force lamte nena hmalak a ngai. Kan unaute an ni chungin tun aṭanga hma kan lak loh chuan nakinah a harsa dawn," a ti.

Sawihonaah hian inter-district joint meeting neih ni se, an ti a; dan loa Mizorama lut an awm leh awm loh endik (surprise checking of illegal immigrants (undocumented) an rel.

Hmalakna atana hman tur System of Procedure (SOP) buatsaih turin SOP Drafting Committee an din a, February 2026 thla laihawlah SOP peih hman ni se, an ti. Sumdawnna chungchangah, LADC lam pawh theihtawp chhuah a, SOP mumal tak siam tura beisei an ni bawk.

Addl.SP, Dy.Comman-dant, 20th AR, Sr.Revenue Office, LADC, DCTO LADC, CYLA President, Lawngtlai MJA President, Village Council Associatio President,LWA, MHIP, LUP leh MUP aiawhte an tel a ni.