KHAWTHLIR

Kawng khâr dawn

Traffic SP C Vanlalvena chuan hriattirna chhuahin, PWD-in Bawngkawn - ITI kawngah Aizawl Venglaia lei tlahniam lai vel chu vawiin aṭangin an siam dawn a, hna thawh chhung zawng zing dar 9 aṭanga tlai dar 5 thleng kawng khâr ṭhin a ni dawn tih a tarlang.

Dr Beichhua tel

Nimin khan BJP Central Office, New Delhi-ah BJP national president thlan a ni a, Mizoram BJP president Dr K Beichhua a tel. BJP national president thlan thar chu vawiinah puan a ni ang.

Thlai thar lei  dan tur sawiho

Lawngtlai District Agriculture Marketing Committee chu an chairman Donny Lalruatsanga, bawrhsap hoin nimin khan an ṭhukhawm a; kum 2025 khan sawhthing lei thawh khatnaah leh thawh hnihnaah Lawngtlai district-ah sawhthing kg. 3,78,387 lei a ni a; kuminah nikum aiin kut hnathawktute'n an thar tam zawk beisei a ni. Kuminah February 2 aṭanga May 30 thleng sawhthing lei a ni ang.

Zoram Thar-in Kumpuan puang

Zoram Thar Zofate Lairelna Inpui hotute chuan nimin khan Aizawl Press Club-ah thuthar thehdarhtute an kâwm a; kumin 2026 hi Zo fate tan milem biakna politics kalphung bànsan rûnpui kumah an puang tih an sawi. An ziaktu lian Lalruatfeli Hlawndo chuan, "Zo fate hnama harh a, inpumkhatna atana pên chhuak a, Pathian lal ram sorkar din turin Zo fate zawng zawng kan sawm a ni," a ti.

Police-in man

Bawngkawn Police Station-a duty-te chuan nimin khan two wheeler rûk chîng hnam dang pali - Zakaria Ahmed (19) s/o Abdul Salam, Saidur, Karimganj, Noor Ahmed (19) s/o Anwar Hussain, Patharkandi, Babul Hussain (19) s/o Moin Uddin, Patharkandi leh Junil Hussain (19) s/o Aftam Hussain, Karimganj nia inchhalte an man. Police-ten thu an zawhfiahna aṭangin heng mi palite hi two wheeler rûkbo thubuai pangaah an inhnamhnawih a ni.