Lok Sabha-ah CAB pass a ni Mizoram MP-in CAB a thláwp

Mizoram aṭanga Lok Sabha MP C Lalrosanga chuan Citizenship Amendment Bill (CAB) a thlàwp thu, December 9, Thawhṭanni zan khan Parliament House-a Lok Sabha session-ah a sawi. CAB hi Thawhṭanni zan vek khan Lok Sabha-ah hian pass a ni.

CAB hi Thawhṭanni chhun khan Union Home minister Amit Shah chuan Parliament-ah a pharh a, sawiho zui a ni. Sawihonaah hian Mizoram MP C Lalrosanga pawhin zan dar 9 velah thu sawiin, CAB-in Mizoram a huam loh tur thu Union Home Minister-in a sawi avangin CAB chu a thlawp thu a sawi.

C Lalrosanga chuan, CAB chu inthlan lai aṭang tawhin Mizorama issue lian ber pakhat a nih thu sawiin, CAB chungchanga an duh dan angte Prime Minister leh Home Minister ten an ngaihthlaksak avangin an chungah a lawm thu a sawi a; Mizoram chu kum 20 chhung rambuai a nih tawh thu leh chumi hnuah India rama state râlmuang ber pakhat a nih mek thu te, CAB chungchang leh thil dang dangah pawh an duh dan leh rilrute Prime Minister, Home Minister leh central sorkar hotute hnenah an thlen tawh a, dawhthei taka an ngaihthlaksak avang leh an ṭhatnaah a lawm thu a sawi bawk.

Mizoram Lok Sabha MP chuan, "Vawiinah hian CAB aṭanga Mizoram leh hmarchhak state dangte min huamtir loh avangin sorkar laipui chungah lawmthu ka sawi a ni. CAB kan pass dawn mek lai hian ngaihtuah pakhat ka nei a, CAB hi ram pathum (Pakistan, Afghanistan leh Bangladesh)-a sakhuana vanga harsatna leh tihduhdah tuarte humhimna pek theihna tur a ni a, Central sorkar leh ram chhunga state sorkar zawng zawngte hnena ka ngen duh chu, kan ramah hian sakhuana vanga intihhrehawmna leh intihduhdahna a awm tawh lo a ni tih hi," a ti a; khawvel ram dang tam takah sakhuana vanga intihduhdahna leh harsatna a la awm thu a sawi lang tel.

C Lalrosanga chuan, Mizoram state ṭhenawm Manipur state hnena ILP (Inner Line Permit) pek a ni chu lawmawm a tih thu a sawi a; CAB chungchang sawi zuiin, "Home Minister zahawm tak hi India hmarchhak bial kaihhnawiha thu a tiam tawhte tipuitling ngei turin ka ngen a. CAB chungchangah pawh, hmarchhak bial venhimna tura a lo tiam tawhte tipuitlin a, a takah chantir ngei turin ka ngen a ni. Chuvangin, Kan lawmna tihlan nan (Home Minister-in a hmaa House-a a lo sawi tawh - CAB-ah Mizoram huamtir loh) he Bill (CAB) hi kan thláwp a ni," a ti.

CAB pharhtu HM Amit Shah chuan, Mizoram bakah, Arunachal Pardesh leh Nagaland-te chu Inner Line Permit (ILP) hmanga hum an nih thu sawiin, "Mizoram leh Arunachal Pradesh chu state pumpui ILP-in a hum a, lungngaihna tur a awm lo. Nagaland pawh, Dimapur leh a chhehvel hmun tlemte tih loh chu ILP-in a hum vek a ni," a ti.

Lok Sabha-a CAB sawihonaah hian Nagaland, Manipur leh Meghalaya MP-te pawhin CAB an thláwp a, Sikkim MP erawhin a thlawp lo thung.