CAB dona total bandh neih a ni MZP-in Lok Sabha MP a dem

North East Students' Organisation (NESO) hmalaknain nimin khan Citizenship Amendment Bill (CAB) dodalna atan India hmarchhak state hrang hrangah total bandh huaihawt a ni a, Mizoramah pawh MZP bultumin hmun hrang hrangah total bandh huaihawt a ni. MZP chuan Mizoram Lok Sabha MP C Lalrosanga chu Parliament-ah CAB a thlàwp thu a sawi avangin an dem.

Total bandh hi Mizoramah chuan zing dar 6 aṭanga ṭan a ni a, pisa, dawr leh zirna-in (zirlai exam mekna tel loin) inhawng a awm lo. Bandh-in a huam loh zinga tel lo - inneihna leh mitthi vuinaa tel turte pawh kaltlangtir an ni. Bandh hian thlàwp a hlawh a, chhuah luih tum duty-te'n an hawtir leh ngai an awm lo.

Bandh neih chhung hian Vairengte MZP chuan hnam dang hnathawk tur leh Mizorama rawn zin turte chu Vairengtea lut lo turin an ngen a, hei hian zawm a hlawh hle. Total Bandh hi chawhnu dar 1:30-ah tihtawp a ni a, bandh neih chhung hian harsatna leh buaina chhuak a awm lo. Bandh tihtawp a nih hma hian MZP president B Vanlaltana chuan Treasury Square-ah draft CAB copy a hâl.

B Vanlaltána chuan, CAB chu nasa taka dodal a nih thu sawiin, "Kan Kristiannate nen kan dodal a ni. Hunpui atana bazar hun laite a ni a, State Games neih mek a ni bawk. Chuti chungin, mipuiin bandh kan huaihawt an thlawp ṭha em em a, kan lawm tak zet a ni," a ti a; thlàwpna an hmuh ṭhat avangin mipui harsatna siam tam lo záwngin bandh chu an titawp hma ta tih a sawi.

MZP President chuan, Mizoram Lok Sabha MP C Lalrosanga'n CAB thláwp zawnga vote a pe chu an dem thu leh an lungawi loh thu sawiin, "Na taka dodal lai, mipui leh kohhranin an duh loh em em laia a thláwp zawnga vote a pe hi ná kan ti khawp mai, kan lungawi lo viau a ni," a ti.

Nimina total bandh an huaihawt zawhah MZP chuan thuchhuah siam nghalin, pawl leh political party hrang hrangte pawh CAB chungchangah an lungruala ngaih a nih laia Mizoram aiawha Lok Sabha-a ṭhu MP C Lalrosanga'n Parliament-ah CAB a thlâwp thu a sawi chu mak an ti a, an dem thu an tarlang a, "Mizoram mipuiin CAB an do laia a lo thláwp hian Mizoram leh hmarchhak inlungrualna a nghawng kan hlau tak zet a ni," an ti.

MZP chuan, C Lalrosanga'n 'CAB-in Mizoram a huam lo' a tih chu MZP, NESO, Mizoram leh hmarchhak mi­puite'n tâwk an ti lo a ni tih sawiin, "Mizo­ramah pawh kohhrante CAB a hlawh­tlin loh nan an ṭawngṭai a ni tih hi kan MP zahawm tak hian lo hria se kan duh," an ti a; Mizoram MP chu a ngaihdan thlak turin an beisei tih an tarlang. 

CAB an dona tihchhiat tum nia ngaih theih an awm chu pawi an tih thu tarlangin MZP chuan, "CAB dodala MZP ke pênin kan Chief Secretary zahawm tak mit a tikham tlat mai hi MZP chuan mak a ti hle. Mizorama pawl hrang hrangte leh political party te, mi hrang hrangin lungrual taka CAB kan do lai leh, Chief Minister zahawm takin MZP-in bandh a huaihawt tur pawh àwm a tihpui thu a sawi laiin, Chief Secretary chuan hemi ni-a duty-te man vek a duh. Minister zahawm takte pawh an duty ve laia sorkar hnathawkte hotu berin inman khawm a duh a nih chuan police-te tan pawh a luhaithlak duh dawn êm avangin MZP chuan dinhmun khirh takah police-te an awm phah ang tih a hlau a, Mizoram mipuiin inlungrual taka an do CAB hi ṭha ti tlat an awm em ni tih hi kan zawhna a ni," an ti.

MZP chuan, India sorkarin hmar-chhaka ILP hmanna state pathumte leh Sixth Schedule hmanga inrêlbàwlna hmunte CAB huamtir loh a tum chu tâwk an tih loh thu tarlangin, "Kan ram leh hnam tana hei aia ṭha zawk leh him zawk beiseia theihtawp chhuah zel a ṭul tih hi MZP chuan a sawi nawn leh duh a ni," an ti a; hmarchhak mipuite chu kawng hrang hranga dinhmun inang, harsatna leh mamawh pawh thuhmun nei an nih avangin a theih ang anga ṭanrual a ngai tih sawiin, Mizoram mipui pawh ṭanrual a ngai tih hre thar zel turin an ngen a ni.