G RAM G leh PM Vishwakarma inzirtir
Ministry of Information & Broadcasting hnuaia Press Information Bureau (PIB), Aizawl chuan nimin khan Serchhip Press Club-ah chanchinbumite leh khawtlang hruaitute pualin Viksit Bharat - Guarantee for Razgor and Ajeevika Mission (Gramin) Act 2025 leh PM Vishwakarma Scheme zirhona VARTALAP an buatsaih.
Zirhonaah hian Aizawl leh Serchhip district-a thuthar thehdarhtu te, Serchhip khawpuia Joint VC hruaitu te, YMA leh MHIP sub-headquarters hruaitute an tel. Serchhip additional DC Lalrinzuala'n hmanpuiin, thu a sawi a; Aizawla PIB hotu Rajeev Lourembam-a'n zirhona buatsaih chhante a sawi. Serchhip district MJA president C Lalhminghlua, Joint VC, MHIP leh YMA sub-hqrs hruaitute'n thu an sawi bawk.
Chawhnu lamah Serchhip ARDO Stephen Laltlansanga Auhmun-in G-RAM-G Act 2025 sawifiahin, DCIO aiawhin C Vanlalhriatpuii'n PM Vishwakarma Scheme chungchang kal khawmte an zirtir a; sawihona leh zawhna leh chhanna hun hman a ni.
VB-G RAM G:
- Sorkar laipuiin official gazette-a a chhuah veleh state sorkarin thla 6 chhungin a kalpui ngei tur a ni a, financial year thar aṭangin kalpui a ni ang.
- MGNREGA hnuaia ni 100 inhlawhna awm ṭhin chu ni 125 a ni tawh dawn.
- G RAM G hnuaia inhlawhna sum chu hmarchhak state leh UT-ah sorkar laipui leh state/UT sorkar ten 90:10-in an intum sem dawn.
- Ministry of Rural Development-in ni khata inhlawhna tur rate (wage rate) a siam dawn a, chumi ang chuan state sorkarin inhlawhna a pe ang.
- Programme officer hnena inhlawhna dil aṭanga ni 15 chhunga hnathawh tur pek an nih loh chuan mipuiin unemployment allowance an dil thei.
- Ni 30 chhunga unemployment allowance pek a nih chuan ni khat hlawh aṭanga ṭhena hmun khat pek tur a ni a; ni 30 hnu lama pek an nih chuan ni khat hlawh zatve pek tur.
- Inhlawhna pawisa chu inhlawh tâwpna ní aṭanga chhiara ni 15 chhungin pek ngei tur a ni a, a hun taka pek loh chuan programme officer-in delay compensation a pe ang.
- Unemployment allowance leh delay compensation chu state sorkar pek tur a ni.
- VEC-te'n G RAM G atana sum hmuh zawng zawng aṭanga 50%-in hna an thawk thei.
- Ni khatah darkar 8 chhung inhlawh tur a ni a; ṭanna leh bân hunah a tira awmte bawkin kim taka thla lak zel tur.
- Contractor rawih phal a ni lo a; convergence hna bikah convergence tihpui department/scheme aṭanga sum hmuh a nih chuan scheme-in thawh tur a tih angin emaw, a ṭul angin contractor hman phal a ni.
- G RAM G hnuaia bungrua/material chu e-tendering hmanga lei tur a ni a, a theih chuan GST registration neite bungrua lei tur.
- Bungraw lian tham lo a nih chuan sorkarin lehkha a chhuah tawh angin programme officer-te'n certificate siam zel tur.
- Hna thawh a nih laia inhliam an awm chuan an inenkawlna senso, damdawi man, etc, te programme officer-in a pe ang. Damdawi-ina awm ngai a nih chuan PO-in damdawi-in awm man, enkawlna senso leh damdawi man te a pe ang.
- Inhlawhnaa hliam chu a inhlawhna ni la bângah hlawh chanve pek a ni ang.
- Piansualna/ramtuileiloa an awm a nih chuan PMSBY angin emaw, sorkarin a bituk angin zangnadawmna pek tur.
- Inhlawhna hmuna naupang hruai, eng emaw vanga hliam an awm chuan a thlawna enkawl tur a ni a; naupang chu piansualna nei emaw, ramtuleiloa awm hlen emaw a nih chuan sorkarin a bituk angin a chhungte hnenah zangnadawmna pek a ni ang.